7个秘诀 让你从此不怕搭长途机！
发布于：2017-02-21 来源：太阳网
当你要搭长途机嘅时候，除左落机后要面对时差问题之外，机上面坐十几个钟一样唔好过，随时会出现体内日夜周期失调嘅情况！徵状包括有疲倦、难以入睡同集中、消化不良，同埋心情变差。
要预防呢啲情况发生，最好嘅方法就系喺飞机上一觉瞓到尾！但点样可以令你可以喺机上瞓得著，甚至瞓得好呢？其实唔一定要坐头等或商务客位嘅，做足以下7件事，坐经济客位都一样可以大觉瞓！
1 小心选择机票
程机嘅到达时间尽量拣当地嘅黄昏时分，咁就会容易啲捱到入夜10点钟嘅瞓觉时间喇。另外，上机后可以将手表或手机嘅时间调校到你目的地嘅时区，睇得多、习惯左，自然就令你嘅身体同脑袋更快适应时差！
2 服用褪黑激素
褪黑激素系一种身体会喺睡眠时间分泌出嘅荷尔蒙，所以喺你想瞓觉嘅时间服用褪黑激素补充剂可以令你身体更易入睡。而需要嘅分量唔多，只要1毫克已经做到呢个效果。
3 上机前食野
上机前先食野，等身体感觉食左晚餐，抖阵就可以瞓觉。而且咁你就唔使等食飞机餐，一上机就可以直接大觉瞓！
4 戴眼罩
光线会影响褪黑激素嘅分泌，令人保持清醒。所以如果想瞓得好，就一定要避免强光，包括手机、电脑等，乖乖的熄晒所有电子器材，再戴一个眼罩遮光，咁就真系perfect match喇！
5 用颈枕
喺机上用颈枕会舒服好多，原因系佢可以承托住头、颈嘅部份，唔使怕瞓著左个头会侧埋一边，避免搞到条颈扭亲，一瞓醒后发现超痛！
6 带一样属于屋企嘅物件
如果想机上瞓得好，就要创造一个理想嘅睡眠环境，包括够黑、够静、够凉同够舒服。除左带眼罩、耳塞、舒服嘅衫之外，仲可以喺屋企带一样野出嚟，闻住熟悉嘅气味，自然就更有安全感，瞓得更好啦！
7 唔好饮酒
谂住上机前同朋友饮返杯尽兴，又或者觉得饮醉会好瞓啲？咁谂就错喇！原来瞓觉前饮酒反而会刺激大脑，令你更难休息！
相关文章