【我试过，真系试过】为左架车 男友老公竟然发我脾气！
发布于：2017-02-20 来源：太阳网
呢个话题又系一大经典：究竟你男友/老公爱架车多啲定系爱你多啲？我可以好肯定咁同你讲：一定系架车！
话说啲男人好鬼麻烦，对你好嗰阵就顺心顺意，尤其系追紧你嘅时候，总之你话乜就乜，佢想话乜都会问过你先。喺呢个阶段，就算你同佢讲：「唔好养车啦，咁嘥钱！」或者「你架车改到咁嘈嘅，换过架斯文啲好吗？」甚至「我想考车牌，到时可以揸吓你架车！」佢都一一应承，因为嗰一刻佢连老豆老母系男人定女人都唔会理，淨系想凼你开心，「好啦，咁我的储钱买楼结婚啦……」、「好啦，咁我换架七人车吧啦……」、「好呀，到时我陪你操车又点话……」一大堆承诺，一大堆好说话，真系乜都噏得出。
到相处落日子有番咁上下，呢啲根本唔系出自真心嘅承诺就会逐一崩溃，本来俾你驯服到好纯良小绵羊嘅佢，慢慢就会打回原形，变成一条极度自我中心嘅死佬！
「喂，而家养架车有羊问题先，我返工放工逼巴士成个几钟先返到嚟，好辛苦架你知唔知？」
「喂，啲楼咁贵储极都储唔到首期，系咪要成世人节衣缩食先？」
「喂，我架车改少少野啫，留番啲兴趣空间俾我好唔好？」
「喂，不如你唔好揸我架车啦，四隻角都俾你high花晒喇！」
拿拿拿！呢啲说话系咪耳熟能详？十个有十个都系咁架佢的，把口就成日话架车系二奶，你先系大婆，实情系你永远都斗唔过架车，因为男人心目中，架车就系佢条命，成日望住摸住捽住，仲频密过同你_ _，个脑一日到黑就喺度谂带佢去边度影相post上FB唉水吹，或者买边个打蜡镀膜套餐好，即使揸车去接你收工，喺等你嘅期间都仲要围住架车望望望，睇下有冇俾啲车门L银凹刮花。一时又话条胎唔够咬地要换，一时又话啲火咀电池偈油到期要换，总之就成日谂点样照顾佢同驶啲羊钱保养佢。你出声话佢羊？佢就一句大晒：「架车你都有份坐架！」
如果你都认同或甚已经接受，啲死佬就系咁衰格爱死物多过爱女人，咁以下呢几个事项，请你务必小心处理，无谓为左架车搞到二人关系破裂。
1. 即管放手任佢玩！
啲男人最憎人萝唆同管佢，因为佢的觉得自己有分数，我玩得起嘅就即系搵到钱，你咪理我咁多。如果佢唔系搞到连饭都冇得开仲顾住入油嘅话，你就由佢玩啦。就算有日俾你见到多左条陌生嘅车匙，原来佢除左「大婆」之外仲学人喺锦田收埋架「二奶」（恭喜番你先，你已成功降格为「三奶」）都唔好踢爆佢，因为玩到山穷水尽佢自然就会停。
2. 唔好评论佢架车！
都话架车系佢条命，你锺唔锺意人随便批你条命呀？唔锺意嘅话就千祈唔好讲佢架车乜乜勿勿，因为咁就等如直接批评佢嘅性格、品味、形象、情操、社会地位同埋人生价值……「咁我讚佢架车得勒瓜？」一样唔得！你讚佢就等如认同佢，而佢一知道你稍为认同，就会无限放大呢种感觉，然后变本加厉去买多好多野、驶多好多钱、改多好多装，总之，任何有关架车嘅都一概唔好俾comment。
3. 千祈唔好揸佢架车！
佢点讲话唔介意你撞唔介意你high花都好，千祈唔好信，因为只系扮大方凼你，到你真系揸佢架车，而咁唔好彩又有羊差池，哗！佢块面即刻仲黑过林郑。「妖！都话左女人唔识揸车架啦……」、「吓？你个车牌淘宝淘返嚟架……」、「唉！又整花边度呀？又跌钱喇……」再难听嘅都讲得出口。
佢点凼你都唔好揸佢架车呀！
整坏左佢架车你就知烦！
想揸车，自己买架好过啦！
如果真系因为架车激嬲左佢，呢啲位你扮小女人好喇：拿，你千祈唔好喊呀，一喊佢就觉得仲心烦随时火起；拿，你唔好话等你赔呀，佢唔系冇钱整，只系肉痛架爱驹受伤啫；拿，你唔好辩驳解释呀，即刻走入厨房煮碗餐蛋丁出嚟，煎脆啲隻蛋条边，切厚啲块餐肉，啲麵落重啲麻油，喂埋佢食，食完无事架喇。
