【轮证赢家】恒指“V”弹?
㖊日恒指走势愈升愈有，原来将本来唔系好郁慨濠赌股同内银股都拎埋出嚟撑市，收市收高于20天线都应该啦；而今朝喺地铁见到恒指开市报29335点，升113点，完完全全企喺条20天线之上。正当我喺公司楼下等紧升降机时，无无聊聊就whatsapp战友Jack讲:“升咁多做乜？”谁不知得到一个答案系：“17点都多？过眼云烟”，坐到位开埋电脑先见到原来粒阳烛已经变埋做阴烛；都系嗰句：就算系高开低收都好，但愿恒指能够喺条20天线上先啦。
依家10点9分，先多谢Sales同事帮我成功捕获被誉为“神龙事”(神龙见首不见尾慨同事)、我老细是也，听完佢个电话之后见到恒指报29237点，最高做过29367点；开恒指牛熊证街货图睇，以恒指暂时做过慨高位嚟计，即系话29300至29399点嗰293张期指都食咗一半咁滞，再向上数多100点，即29400至29499点，呢度就有相当于658张期指，虽然系未过千，不过呢度已经系熊证最重街货慨范围啦。
下方睇埋牛证，最贴价慨系28700至28799点，呢度有相当于88张期指；而㖊日数过由28600至28699点、28500至28599点同埋28400至28499点呢三个100点范围都无货慨牛证范围，今日就分别有182、72同22张期指系度，系唔多架，不过叫做有咁解啫。而牛证重货区仍然系喺28000至28099点，呢度有910张期指，比前日少咗慨原因相信都唔使我解释，㖊日咁升法，连条20天线都穿埋，远牛换近牛，或者索性收割等过圣诞都唔出奇呀！
再睇埋恒指日线图上，14RSI同SlowSTC(14,3)都回升返至中轴水平；而MACD就刚刚发出“双牛”号讯，DMI慨+DI亦刚好今日升穿-DI；再加埋上文按牛熊证街货图慨数嚟计慨话，今次呢一插落100天线然后反弹都有可能会见“V”字，恒指牛(63250)，收回价28500点，34倍杠杆不过不失，胜在成交够活跃；唔知向住只牛举个“V”字手势，会唔会真系“V”咗出嚟呢？万一真系慨话，条颈线咪就等于个target位啰？
作者阿珊，从事财经及投资版报道超过10年，由平面媒体走到网络世界。相信技术分析，由窝轮到牛熊证无一不炒，唔贪心，志在揾餐下午茶。
