【轮证赢家】恒指企稳10天线
㖊日睇过牛熊证街货量，计到恒指刚好企喺中间位唔知点算好，两头唔到岸慨时候，就梗系咩都唔好做，坐定定喺度，食饱个早餐先再算啦；完咗上半场都见佢无乜料到，就高高兴兴同师兄刘兆昌两条友去咗湾仔码头食日本嘢做lunch(一年先得嗰一日系咁食架啫)，食到饱饱返到公司凳都未暖就要开会，唉，打工仔最难顶莫过于饭气攻心时要开会呀！Anyway，师兄，多谢你餐饭。
开完会就大件事啦，恒指唔声唔声咁爬升咗200几点，到收市时仲升逾300点，条50天线穿到穿多次都仲得咁滞；奈何过到条50天线，就过唔到条10天线呢！反正㖊日只系做只塘边鹤，拿拿声做埋公司啲嘢早啲收工去捐血(够期啦嘛)。
今日喺地铁见到企我隔离个阿姨开报价App睇市，小妹唔系无电话，但你知架啦，我本身做记者架嘛，就梗系有一条八卦慨根存在架啦，阿姨睇咗(我记得慨都讲晒，排名不分先后)：腾讯(00700)、汇控(00005)、中银香港(02388)、阅文(00772)、众安(06060)、港交所(00388)、吉利(00175)、比亚迪(01211)、易鑫(02858)，然后见阿姨只App顶头show咗个开市价：28972点；到我打完铺机，转开报价App时，恒指已经上到去29000点楼上，适时战友Jack WhatsApp我：(好多只大象慨emoji)动大迁徙。
开恒指牛熊证街货图睇，下方最贴价慨牛证系28100至28199点，呢度有相当于747张期指，同现价(11点2龋报28932点)比相差有733点；至于上方熊证最贴价就系29000至29099点，呢度慨距离就当然系近啲啦，相差167点啫，不过期指张数就少啲，得431张。
So far见到恒指都系企咗喺条10天线(28891点)上面，但点数上除咗今朝开市嗰吓相对比较chok之外，就好似只蟹咁横行，年尾市静真系无错，继续观察吧！
作者阿珊，从事财经及投资版报道超过10年，由平面媒体走到网络世界。相信技术分析，由窝轮到牛熊证无一不炒，唔贪心，志在揾餐下午茶。
