【盘房来料】唔重上50日线暂时死心
港股自30200点见顶，阿Man之前讲咗，呢个系2017年顶部，短短两个几星期，已由该水平急挫二千点，仲要之前两日急挫逾900点，畀个面都要反弹，但无谂过个市弱成咁，弹到28500之前已乏力，弹完又散过。
恒指今早裂口高开141点，一度升逾200点，高见28478半日高位，之后已乏力弹完又散，更曾倒跌28134点，逼近100日线(28121点)，中午报收28226点，仅升1点，仲衰过无得弹。国指则再跌20点，报收11142点，又系畀阿爷拖死。
唔少人问阿爷几时出嚟维稳，了解国情都知道，阿爷经过2015年溶断一役，已出尽洪荒之力托市，结果惨败。如今维稳系有秩序下跌，每天跌你多一些，同埋限制基金沽货，咁内地基金无得沽，唔代表其他投资者唔可以走人，结果上证指数就失完3400，再失3300点。
腾讯(00700)今日暂停‘企鹅屠牛记’，今日一度反弹至375.8元，即系阿Man预期反弹水平，半日仅升1.5%，报收371.6元。由高位439.6元跌咗几70蚊，家吓先话弹几蚊，确系杯水车薪。要怪就怪太多缸边友买重腾讯牛，更有消息指内地有金融机构推出380元接货价慨I kill you later，接咗货慨投资者，为免损失更多，争相出货，再加埋大量牛仔触及回收价，恶性循环之下，腾讯跌到走晒样。虽然早两日腾讯已㓥咗唔少肥牛，但喺350-365元仍有另一个重货区，再数落去要到330元楼下至鲜见牛踪，咁慨情况下，腾讯有排都系有反弹，冇上升，炒波幅高难度，入货长坐又未系时候，都系食吓花生算数。
连龙头都反弹乏力，其他科技股亦咁上下，iPhone未有预期咁好卖，连阿Man呢个忠实果粉都冇兴趣换iPhoneX，苹果概念股死晒火，瑞声(02018)叫做好啲仲有得弹1.2%；但插到咀歪慨舜宇(02382)弹半成后，半日倒跌0.1%。次一线蘋概股，丘钛(01478)挫4.9%；高伟(01415)跌0.8%，连跌第11日。其他科技股多数仆直，几只新经济半新股再创上市新低。
汽车股跟内房股续跌，睇见唔开胃，试问咁多个之前强势慨板块都弹唔起，港股可以弹得去边，睇嚟都系弹散格局。不过暂时28200有啲支持，或者喺28200至28500之间吽吓先，但久守必失，大市未能短期重上50日线，即28700水平，暂时都系死咗条心。
麦狄文
(徐狄怡‧证监会持牌人)
