【盘房来料】恒指牛证重货区全数入屠房
隔晚美股科技股唔算跌得多，终于轮到道指跌得多啲，不过三大指数齐跌，拖累整个亚太区股市表现。港股几乎平开，最多升86点，高位又底过星期二，继续一浪低于一浪，其后喺A股跌穿3300点重要支持位，港股即掉头向下，兼且直插无水花，最多跌471点，低见28372点，接近保历加通道底部反弹。中午报收28481点，跌361点；国指更弱跌206点，报收11277点。
今早港股上演屠牛记，除咗腾讯(00700)杀晒370元至375元慨牛证，恒指牛证亦杀到尽咁滞，由28300至28800点慨牛证重货区全部阵亡，依家28000-28300点慨牛证街货唔多，睇怕喺现水平，都可以抖抖。不过恒指跌穿50日线(28725点)，呢个位将会成为反弹阻力。若然今早系今次调整底部，估计12月余下时间，有机会喺28300-28700点之间筑底。不过市底已转弱，一旦再失28300点，睇怕要落到28000，甚至27800点先有支持。
腾讯早段曾反弹至最高381.4元，可惜382元连影都唔见，即再掉头向下低见369元考验50日线，目前喺50日线附近争持。过往腾讯甚少失守50日线，但唔代表今次唔可以，一旦失守，要睇番100日线(350元)，刚好亦系今次升浪起步位。至于另一强势股平保(02318)，亦已由强转弱，话咗反弹企唔稳78元，要再下试72元至75元，目前正向住呢个方向行。
至于呢期有资金流入慨金融股，除咗平保之外，其他内银、内险同国际金融股都要捱沽，全线下跌，普遍跌幅由0.8%至2.5%，咪话唔湿滞。至于科技股全部返艇，之前升得急，跌起上嚟亦凶狠，腾讯虽然再㓥牛，但跌幅已相当温和，半日最多都系跌1.9%，中午收市跌1%。其他科技股，最低消费系跌2%，而㖊日已失50日线慨舜宇(02382)半日跌7.5%，成为最屎蓝筹股。由于iphone最新销情只系一般，瑞声(02018)亦跌6.6%。
另一个重灾区系汽车股，道理一样系升得急，插得甘，吉利(00175)最惨情时跌近一成，半日跌7.3%，同舜宇跌幅叮当码头。至于其他汽车股，闲闲地跌2%或以上，跌势已成，暂时唔好多手捞底。
依家港股最大镬系畀内地股市拖死之余，上周美股狂升之际，港股唔跟上，但面对美股回吐，港股又跟住落，望就望今日低位，即上升通道底部守得到，守唔到真系无眼睇。即使中长线仍睇好后市，建议都系要分段买货，呢个12月仲有排捱，阿Man之前已叫喺三万点锁定利润，家吓兵荒马乱，都系食住花生靠边站。
麦狄文
(徐狄怡‧证监会持牌人)
