【盘房来料】港股再失廿日线唔识弹无命
隔晚花旗继续庆祝税改方案好大机会搞掂，道指再创新高，不过标指已脚软，纳指更插到反晒艇，跌逾1%。港股㖊日无借美股再创新高反弹，反而高开低走，反映市况已由强转弱，夜期更漠视美股上升再插水，失守29500关，今日返嚟港股进一步下跌，连条20日线(29282)都失守。
恒指低开283点，先失守10日线(29609)，之后直插无水花，去到29159点半日低位先识停，最多跌465点，20日线(29282)亦玩完。虽然喺内地股市跌幅收窄下，港股跌幅一度收窄至270点，见29353点半日高位，可惜始终企唔住开市价，又再掉头回落，中午收报29245点，跌377点；国企指数报11496点，跌151点。
花旗科技股反晒艇，港股呢边慨科技股亦成重灾区，股王腾讯(00700)开低超过12元，即失400元大关，低见398元有反弹，半日报收402元，跌2.3%，暂时险守400元心理关口。阿Man眼见系唔少散户呢两日不断博反弹，可能周二博反弹得尝甜头，食过翻寻味，今日唔少散户又出动捞腾讯。不过㖊日阿Man已提咗大家，博反弹见好要收，尤其呢几日市况都系有波幅，冇升幅，反弹更一浪低于一浪，话咗周二慨所谓单日转向唔能够肯定调整完成，唔够一日港股又再插水。
纳指急跌创三个月最大跌幅，港股呢边慨科技股全线仆直，除咗腾讯急回，瑞声科技(02018)曾挫半成，半日跌4.4%。下星期一升级做蓝筹慨舜宇光学(02382)亦无面畀，半日急挫4.8%。其他5G概念股同软件股齐齐过堂，鸿腾(06088)跌3.4%；中芯(00981)跌2%；ASM太平洋(00522)跌3.8%；中兴(00763)跌2.6%；金山软件(03888)跌3.3%。同属科技股板块慨几只半新股，弹元又散，阿Man已重叮万嘱博反弹唔可以贪心，㖊日无趁反弹沽出，今日又再脚软，阅文(00772)、易鑫(02858)跟雷蛇(01337)，闲闲地跌2%或以上，众安(06060)则跌1.8%。
除咗腾讯插得急，之前几个火车头亦显著回吐，友邦(01299)跟平保(02318)有大行大合唱亦撑唔住，前者半日跌3.8%，平保裂口下跌，半日唔见2.8%，港交所(00388)跌幅亦超过1%。HIBRO升破1厘水平，喺自2008年金融海啸以嚟最高水平，虽然今早略为回落，但拆息扯高，对股市嚟讲绝对唔系好事。不过拆息上升有利本地银行股，呢个板块逆市上升，中银香港(02388)半日升1.2%，盘中曾高见39.7元三个月高位。大笨象(00005)同样逆市上升，不过呢个板块慨升幅，当然唔能够弥补其他重磅股下跌，对恒指带嚟慨跌贡献。
已经讲过期指29300点，恒指20日线系重要支持，唔守呢个支持位，呢一段升浪结束，中期调整开始，至于呢次调整深度有几大，时间有几长，阿Man唔去估亦唔预测，但30200点好大机会系2017年高位。
麦狄文
(徐狄怡‧证监会持牌人
