【盘房来料】捞底反弹唔走得个桔
隔晚花旗参议院慨税改通过咗审批，缸边友当正税改方案搞掂咁庆祝，三大指数劲升，虽然金仔又玩嘢，半夜放导弹，但最终三大指数仍创收市新高。夜期隔晚亦跟住美股做好，只不过今日大市又系高开低走，始终又要落番条10日线(29581)争持。
恒指高开133点见29814点，已经系上半场高位，一开市即掉点向下，唔使半钟钟已跌逾百点，半日最多跌117点，见29563点半日低位，中午报收29574点，跌106点；国指跌69点，报收11635点。
当个个以为㖊日系单日转向V弹，调整完成再起步，偏偏大市同你向下玩，今日期指结算日，估计上半场出咗个方向落到29600水平就唔多行，大市仲喺阿Man所指慨区间内上落，29300点唔失，大市未死得，同样30000企唔稳，再上亦冇运。咪睇少呢区区七百点，单系玩过山车已经足够玩死缸边友，目前呢啲市况，只能以短打作对策，由于大市波幅扩大兼走势飘忽，低位捞货有食速食，咪再谂住扑晕自己，扫完货乜都唔理。
金仔射导弹已唔再对股市带嚟震荡，依家系睇住内地股市点行，今早A股又再跌过，拖累港股弹唔起仲要倒跌。内地债市有问题已影响缸边友信心，家吓又话要规管基金买卖，兼且内地银根喺接近年底至农历年前后，例牌水紧。加上港元拆息持续上升，已现重返1厘水平，港股无生水流入，短期再难发威。
预咗腾讯(00700)喺恒指下周一执位前有波幅，冇升幅，承接昨日反弹系威系势，今日高开422.2元，最高见422.8元又调头。半日报收413.2元，弹完一日又插过。喺呢个礼拜五前，指数基金仍要减持腾讯，以配合腾计占比回调至10%，低位捞到货有食要食。其他重磅蓝筹都系咁上下，友邦(01299)跟平保(02318)同样高开低走，半日分别趺0.6%及1.2%。今日靠港交所(00388)同大笨象(00005)托住个市，大价股又系升一啲，又跌一啲，摆明有心人托住指数换马或减持。
其他科技股都冇运行，手机设备股同5G概念股跟住大市回落倒跌，博反弹唔肯食又系得个桔。反而几只半新股逆市反弹，，众安(06060)曾升3.8%，半日升2.7%；阅文(00772)升1.4%；雷蛇(01337)升3.2%；易鑫(02858)升3.8%。仲有货慨缸边友，好趁机会再减磅。
麦狄文
(徐狄怡‧证监会持牌人)
