【盘房来料】30200确认双顶中期调整随时开始
隔晚美股开始乏力，虽然道指仍有进涨，但标指跟纳指见完高位已掉头向下，而A股更无力反弹，上证指数失3400关，累跌近百点仍未识弹，拖累港股今日进一步下跌，失守10日线(29483点)。恒指开市跌77点后，跌幅扩大至201点后曾作反弹，可惜外围股市全线向下，至中午收市前，跌势再转急，盘中取多跌267点，至29418点半日低位，中午报收29420点，跌265点；国指跌幅更达1.5%，中午报收11591点，跌180点。
几只重磅蓝筹股走晒样，腾讯(00700)同大市齐失10日线(410.8)，10日线失守唔系睇住条20日线(395)，系有机会回补裂口，要见388元至392元。至于平保(02318)亦显著跌2.45%，同样失10日线(80.55)，20日线喺(76.5)，可能要去到呢个位先有支持。再加埋友邦(01299)同样失10日线(66.7)，20日线喺64.15。呢三大巨头已占去恒指过半数跌幅。
话咗升到龙尾股或者蓝灯笼都系湿滞，中移动(00941)逆市升0.82%；大笨象(00005)虽然唔系龙尾，但都算落后，逆市升0.13%，仍然未靠稳77元，嗰些少升幅都系无助大市跌势。内地股市软弱无力，中资金融股偏软，内险股闲闲地跌2%或以上，内银股同样无运行，建行(00939)畀灯神祝福完，今日即跌逾1%，灯神准到一个点，同佢做反方向，保守可以养妻活儿，进取可以创业兴家，好快由山脚搬去住山顶。
其他乜股都濑嘢，强如濠赌股亦要陪跌，虽然下跌幅度唔算大，但升势暂告一段落，又要进行整固。至于内房股月初已先行一步，率先回落，至现水平反而有啲支持，睇嚟沽压消化得七七八八，可惜市弱暂时都系忍忍手。汽车股再作微调，之前最急落嗰段见咗，嚟到现水平唔上唔落，同样步入整固期。
阿Man都讲咗呢两日唔上番30000楼上企稳，大市再创新高无望，今日仲要失守10日线，若然进一步失守29300点，即系上星期突破升浪起步点，已好肯定30200点系双顶，双顶回落威力有几大，一千几百点系基本消费，其后同你玩慢落猪，作深度调整，狼起上嚟跌够二千点落番二万八都唔算夸张。
今日咪再问阿Man啲大价股可以博反弹未，之前几日已一直话唔使急，如今确认大市要见顶回落，12月随时只有波幅，唔会有升幅，既然未知边个系底，边个位有支持，宁愿耐心等候调整完成，转番升势再买亦未迟。阿Man宗旨一向系宁买贵，莫买错。急住买未知几时完成中期调整，仲要坐住等肯定唔舒服，倒不如等调整结束，回复升势再追入，升住等点计都系好过艇住等。
麦狄文
(徐狄怡‧证监会持牌人)
