【盘房来料】濠赌股强势可延续至年底
上周五港股反弹，夜期更跟随美股半日市做好重上三万点，不过A股继续阻头阻势，今早港股又畀A股拖累，恒指低开8点后，开市见一见29859点半日高位，跌势加剧显著受压，半日最多跌236点，见29630点半日低位。其后几只重磅股跌势喘定，跌幅收窄，半日收报29737点，跌128点；国指则跌100点，报收11807点。
喺月底指数成份股执位前，腾讯(00700)要继续捱沽，皆因要减磅至占恒指10%，指数基金沽货，不过挨近410元又见买盘吸纳，估计腾讯10日线(409.4元)可守。暂时腾讯有波幅，冇升幅，估计喺405至425元廿皮内上落，要短炒自己揾位上落车。平保(02318)今日亦见回吐，皆因A股太样衰，拖累中资金融股普遍脚软。呢个板块唔给力，大市好难有得升，暂时都系回调整固格局，大跌条件冇，大升亦冇诱因，呢个月累计升逾千四点，抖抖都好正常。
加埋呢个星期花旗参议院将表决税改方案，暂时市场倾向相信通过机会较高，但通过方案亦非一帆风顺，话唔定又一大堆附带条件，兼且落实日期可能延后，呢啲都成为美股调整借口。家阵内地股市喺债市唔稳妥之下，银根有啲紧，虽然北水持续流入，但内地银根始终唔系松，北水买买吓分分钟要停手。再加埋美股有机会揾借口抖气，港股呢个星期要再创新高有难度。仲要喺周三期指结算前，呢两日系转仓高峰期，阿Man都预咗个市chok上chok落，暂时喺29600至30200点呢600点玩到你陀陀拧。
大市上到现水平，大家要开始习惯波幅扩大，一日行四五点波幅系等闲事，好似今日上半场，由29900水平插水至29600，再反弹至29800之前，样已经行咗400点。
科技龙头唔精神，整个板块亦回吐，当大家以为手机设备股抖抖时，5G概念可接力，偏偏今早一高追又中伏。留意呢个时候唔同之前，向上突破高追易坐艇，仍然相信5G概念系嚟紧受捧板块，反而回调系低吸机会，跌至10日线可先买一注，20日线再买第二注。
另一个阿Man喺月初已表示可以强到年底慨板块濠赌股，喺大市创新高后未见回调压力，反而愈战愈勇，年底例牌系濠赌股旺季，预期呢两个月慨博彩收入有增无减，非博彩收入亦受惠下月假期而上升，当然首选仍然系龙头银娱(00027)，永利澳门(01128)亦创近3年新高，呢对孖宝果然无令大家失望。
麦狄文
(徐狄怡‧证监会持牌人
