【盘房来料】处于支持于阻力位中间难博
隔晚美股感恩节假期休市，港股㖊日午后即趁呢个机会玩嘢，加上A股确系陀衰家，喺股王茅台插水，同埋债市资金紧张情况下，A股连日下跌，上证指数更失重要支持位3400点，港股㖊日下昼借势倒水，由30000点直插400点至29600先有支持反弹，全日跌咗295点，报收29708点，险守29700水平。
恒指今日高开80点，一度升210点，见29918点，可惜29900关再失守，倒跌11点，见29696点半日低位，喘定后回升，中午恒指报收29804点，升96点；国指则升116点，报收11853点。不过周末前夕，缸边友入场唔积极，半日成交额只有589亿元。
领展(00823)成为最大升幅成份股，创70.85元新高，半日升1.82%，报收70.1元。领展属防守股，喺大市回落调整之际上升，反映资金开始以守为攻，唔再博命，避险情绪正升温。陀地地产股今日支撑大市反弹，长地(01113)同新地(00016)均升逾1%，恒地(00012)亦录得近1%升幅。地产股有得上，多得联储局份11月会议纪录用词偏向鸽派，明年未必坚持加息三次，有利地产股跑赢大市。
散户血肉长城要小心
除咗陀地地产股，金融股亦给力，话咗建行(00939)系内银股首选，今日反弹力度亦较大，半日升1.6%。重磅股又系金融股行先，汇控(00005)升0.3%；友邦(01299)升0.7%；平保(02318)升1.6%。至于股王腾讯(00700)喺440元cap咗顶之后回落，今日第三日下跌，股价再跌1%，半日报收415.2元，散户喺415元筑起血肉长城。根据过往经验，散户一筑起条血肉长城，嗰个位唔会系支持位，反而要插深啲，想博腾讯反弹唔使咁急出手，落番410元先考虑未迟。
另外两只科技龙头兼蓝筹股瑞声(02018)同埋舜宇(02382)继续调整，两股跌破10日线后跌势持续，暂未宜捞底。其他科技股亦向下，之前升得急，回吐自然跌得甘，唔少科技股都已失10日线，表现麻麻。
面对今日咁慨市况可以点，阿Man选择做花生友，皆因指数喺29800点认真唔汤唔水，㖊日29600水平有支持，但上面30200点分分钟短期见顶，加上期货开始转仓，月底又有rebalancing，估计暂时反复波动，大市唔企番稳30000点难再向上，一旦29600再失，呢转升浪几乎肯定告一段落。至于之后会唔会出现深度调整未肯定，但29600再失，30200半数确认已见顶。家吓喺29800至29000水平徘徊，刚好中间唔上唔落，咁慨形势选择做花生友。
麦狄文
(徐狄怡‧证监会持牌人
