【轮证赢家】长尾理论
㖊日恒指高开低收，临尾市收报30003点，呢个30000点似乎有啲好险咁慨感觉；今朝早恒指只系微升30；依家10点9分，回复完一位读者慨email之后，睇返个市都系未有咩异样，转条恒指波幅指数出嚟睇，怪不得啦，㖊日一chok将恒指波幅指数由前日(11月21日)约14水平弹高到㖊日15水平，今日恒指波幅回落，同时令恒指波幅指数下跌，或者应该系补返㖊日个裂口慨。
姜大伟有一句说话：“最锋利慨刀都有生銹慨一日”咁更何况系股呢！早前带领大市系咁升慨腾讯(00700)同平保(02318)呢两日好明放缓(只企鹅仲要逆市跌添)，跟手前两日港交所(00388)、友邦(01299)、工行(01398)同建行(00939)就“三叔接力”队咗两日到㖊日慨最高30199点就好似行人止步，呢个点数正呀，因为正确嚟计呢口价系做到30199.69，用0.69点嚟将30100至30199点慨所有熊证杀晒。
早两日讲过成个恒指好似靠腾讯同平保撑起半边天，成个市场慨成交集中晒某一两只股份身上，经济学上称为二八定律；然而二八定律出现后其实引伸咗另一套理论──长尾理论。好简单，二八定律就即系有八成慨收入都是来自两成慨货品，咁剩底嗰八成慨货唔通做花樽咩？于是嗰八成慨货品销量虽然无最畅销嗰两成，但系有成八成慨货量，就算“平啲卖”，积少成多慨情况下所得到慨收入亦不比嗰两成最畅销慨货少。或者二八定律慨出现，随之产生余下八成货、两成利润，就好似尾巴咁，而呢条尾巴有成八成慨货咁长，所以叫做长尾理论挂。
套用于股市，好明显腾讯同平保就系二八定律，两只股份由10月31日收市起计，至㖊日收市为止，均升逾22%，同期恒指升6.2%，系成件事慨头；而“三叔接力队”，即系港交所、友邦、内银股等就变成个尾，亦即系长尾理论部分；甚至之后可能推高二、三线股，到最后禾雀乱飞，成件事都系属于长尾部分。“三叔接力队”讲紧都系呢一两日出现慨事，呢一众尾巴能唔能够追得上腾讯同平保嗰种大幅度慨升幅？
转睇牛熊证街货图，牛证最贴价慨系29100至29199点，有成逾900张期指，多又如何，太远啦；熊证最贴价系30200至30299点，有相当于420张期指，再上多100点，即系30300至30399点，都有375张期指守候，咁计数似乎呢条尾巴都有方法令个市继续向上抽；唯策略上以day trade做法比较稳健，毕竟大市都超买啦。
作者阿珊，从事财经及投资版报道超过10年，由平面媒体走到网络世界。相信技术分析，由窝轮到牛熊证无一不炒，唔贪心，志在揾餐下午茶。
