【轮证赢家】同市场斗快！
平时《轮证赢家》会用比较大篇幅去开解当日恒指牛熊证街货图，从中推断大市上定落慨机会较高；但㖊日篇文就用咗大部分篇幅讲二八定律，只系文末讲咗句“只系需要多约250点就可以食到有约2000张期指慨熊证”，系无作任何推介慨情况吓，读者Alan email问我：“呢条数即系买牛证啦值博率高啲啦”，真聪明，所以我email覆佢只系讲咗句：“yes”；谁不知㖊日用全日高位29818点收市，一步到位地就完成咗个day trade；今日开市升穿30000点亦有啲预咗，因为朝早喺屋企咬紧块包时，电视报美股又升，右下角日经粒数系报紧升二百几点，今日恒指唔见“3”字头又点对得住啲乡亲父老呀。
前排日日都腾讯(00700)同平保(02318)，新经济股撑起何止半边天，直头系成个天啦；但今日(依家10点11分)，呢两只股都逆市下挫(其实恒指升幅都有所收窄)，接力慨就到港交所(00388)同一众内银股，开咗市一个钟都未够就已经有500亿成交，咁你话港交所生意有乜可能唔好架。
先唔好理人家啲梯队阵容，事关边条队上个目的都系想队高恒指(呢啲排第二三慨梯队就系㖊日有及过慨“长尾理论”，市间无嘢写时先再讲)，依家先开恒指牛熊证街货图睇，望望电视机mark底10点20分，恒指最高做过30195点，呢个点数度上去街货图度，即系踩住30100至30199点呢度，虽然仲争4点先至叫做完全食晒呢度堆街货，但4点啫，计埋啦好吗？如是者恒指一开市先杀29800至29899点同29900至29999点呢两个最贴价慨熊证街货，夹埋有1439张期指；之后用咗10分钟唔够慨时间再队到上暂时高位30195点，换言之连30000至30099点同30100至30199点呢两part熊证都杀埋，夹埋有1563张期指，即系话恒指喺今朝开市用咗唔够10分钟慨时间就杀咗4个100点慨熊证街货区，总共食咗3002张期指，呢个分量同朝早打个边炉做早餐真系无分别。(真系有人晨咁早打边炉架，小妹3月时去咗台湾清境农场玩，嗰度慨民宿份早餐系每朝由老板捧出嚟比你，其中有一日就系一个边炉啦)
晨早个市食到咁饱，怪不得依家个升幅同今朝开市无分别咁呆滞啦，日线图暂见恒指裂口弹咗上顶，高开低收呈一粒“十字星”，加上14RSI已到74，技术指标全数反映超买，继续再追升唔系无可能，因为呢个世界可以超买再超买，但应采且战且走，同个市斗快慨策略。
作者阿珊，从事财经及投资版报道超过10年，由平面媒体走到网络世界。相信技术分析，由窝轮到牛熊证无一不炒，唔贪心，志在揾餐下午茶。
