【盘房来料】穿顶去估顶将付出代价
㖊日上半场收市，同今日上半场收市，两个世界截然不同，㖊日大市以为29300水平cap咗顶，谁知隔晚欧美股市稍作反弹，夜期已企稳29300点之上，今日恒指高109点，虽然落过29343点半日低位，但29300系阿Man之前一直强调慨大位，升穿企稳就要挑战29450-29600，结果今日上半场两个目标已抵步。上半场最多升391点，高见29652点再创近10年新高。恒指中午报收29619点，升359点；国指反弹报收11758点，仍未上破之前高位11817点，始终内地股市表现呆滞系负累。
经常都话股票升穿顶唔估顶，阿Man㖊日衰咗，谂住腾讯(00700)见到410元已达标，自把自为去估顶，沽出认购相关衍生工具，收市股价再升至420元，衍生工具太早沽出，赢少一大截已等于输镬甘，呢铺买咗好大个教训。幸而正股一直采取唔回唔沽策略，睇佢唔倒慨心态，否则见到腾讯今日再破顶高见439.6元，真系会心理唔平衡兼想自尽。若要问阿Man腾讯乜位撤退，只能够答一句，将止赚位推高至430元继续持有至天荒地老，而止赚位更要跟随腾讯升幅而向上调整。
除咗腾讯之外，今日其他重磅股好似平保(02318)、友邦(01299)同埋港交所(00388)都齐齐发功，至上半场尾段，内银股都加入趁热闹。港交所升穿235元再挑战年内高位，顺利创242.6元今年新高，升幅超过4%，暂时老虎蟹都唔估顶，即使港交所沿途仍有唔少蟹货高位伺候。至于平保分拆陆金所系重头戏，大行大合唱完腾讯，轮到齐齐唱好兼调升平保目标价，更有大行指平保可变红底股，股价半日升5.8%，成为蓝筹升幅冧巴温。其他内银股亦上升，不过未有平保再创新高慨气势，但普遍录得3%升幅。友邦见调整完成，再帮手推高指数，股价升1.8%，暂时梗系睇破顶再算。讲咗大笨象(00005)无运行就无运行，股价逆市下跌，皆因20亿美元回购刚好完成，暂时无乜吸引力，股价失75元只有更弱，市况就系强者愈强，完全无得拗颈。
内银股亦随内地股市回升做番好，不过暂时都只系升至反弹阻力附近，未算回复强势，相信都系叫做帮吓手咁，要数强势股未轮到内银呢个板块，喺资金集中追捧强势股之下，唔建议开多条战线。值得留意系券商股又升，喺过去一年以嚟，餐餐升到券商股都系水尾，当然大市升穿顶唔估顶，但阿Man宁愿死坐强势股都唔追落后券商股。
㖊日讲过戴上马氏光环慨股份未必一定得，切忌沟货愈沟愈淡，结果阅文(00772)、众安(06060)同易鑫(02858)齐齐逆市下跌，暂时唔慌有运行。至于阿里巴巴入股慨高鑫(06808)同一命运，今日再跌3.7%。
麦狄文
(徐狄怡‧证监会持牌人)
