【盘房来料】戴咗马氏光环未必一定升
美股上周五回软，港股高开低走，恒指略为高开曾升百点至29300点水平，但未能进一步向上突破，掉头向下最多跌109点，至29090点，刚于10日线(29071点)前刹掣，其后跌幅收窄。恒指中午报收29151点，跌47点；国指则报11510点，跌97点，又系畀内地股市拖累。上证失3400点后进一步向下，今日再跌至3350水平附近，话咗上证系阻碍港股上升一大障碍。
腾讯(00700)又系单天保至尊，今日再创409元上市新高，半场报收408元，再升4.6元或1.1%。阿Man之前预计咗，腾讯业绩大户满意的话，股价可挑战403至410元，家阵已达标，阿Man继续按原定计划减磅锁定部分利润。皆因腾讯100%街货牛证愈嚟愈多，call轮亦出现同样情况，大户趁正股扫高派发衍生工具系人之常情，依家唔派等几时。派到咁上下，股价进入横行整固，甚至调整向下，衍生工具足以半死不生，大户正中下怀。阿Man宁愿食少啲都唔愿倒呕，既然股价已达标，衍生工具都系食咗先讲，话咗衍生工具要嚟炒唔系要嚟坐，有食唔食，罪大恶极。
其他重磅股，大笨象(00005)暂时险守75元，话咗股价升唔穿77元无运行，短期旨意佢带起个市已无望。至于港交所(00388)亦喺240元前停步，暂时已cap死咗个顶，235元失守走势转弱，230元失守落得仲快。至于平保(02318)亦已见过80元，同样已达标，分拆陆金所只闻楼梯响，炒咗呢个消息咁耐，都系时候要抖抖。其他内险股同样脚软，内银股有北水买住亦唔够照，上日见完高回回头，今日下跌反映北水扫货慨同时，外资沽货力量更大。
话咗半新股炒作时间有限，上市后玩三两个交易日，叫住小心贪字得个贫，易鑫(02858)首日上市已叫食糊走人，话咗唔系腾讯亲生仔，期望不能过高。嫌赚少咗唔肯走，今日跌穿埋招股价仲头晕。其他半新股、雷蛇(01337)、阅文(00772)同众安(06060)全线仆直。
阿里巴巴收购高鑫零售(06808)，不过G.O.价6.5元远低于停牌前价格，开市股价曾升至9.28元逾三年高位，最多倒跌13.6%至7.43元，半日报收8.39元，较低牌前跌2.4%。睇番高鑫同易鑫，边个话戴住马氏光环一定掂。
濠赌股反弹，其中永利澳门(01128)更创22.6元新高，其他濠赌股亦有追捧，阿Man自年初已睇高呢个板块，由年初升到年尾，股价倍升有晒交代，唔好再问现价可唔可以再追。
麦狄文
(徐狄怡‧证监会持牌人)
