【轮证赢家】试水温变烚熟脚
㖊日见到个市呆呆滞滞咁，又见技术指标同走势都发出向淡讯号，拣定只恒指熊(67879)出嚟，谂住扑唔中大跌市，都扑得到个小转角呀。day trade嚟讲就真系唔愁入市位，但就真系无位比你走；如果用“今日买、明早沽”慨策略的话，晨早流流应该火都嚟埋，兼且仲要收到啲push话“腾讯创新高曾见400元”、“平保高见80元创新高”，相信个人啲燥底出晒嚟；若然撞啱一朝早多嘢做，呢个又问嘢嗰个又问嘢慨话(即系好似我今朝咁)，饮几多支廿四味都无用。
今日恒指裂口高开，开市报29214点；首5分钟已经弹穿咗29300点，暂时高位喺10点40分做过29341点。老老实实，我今朝暂时叫做处理完公司啲嘢，即系依家已经11点2分，恒指现报292xx点啲位，今朝个裂口未补唔紧要，反正5分钟图见恒指都慢慢抽返上去。
至于恒指牛熊证街货图方面，本身㖊日个位就喺中间偏低(即系近牛证)慨水平，但今日一抽，好似跳飞机咁跳返上去熊证，按暂时恒指做过慨高位计算，29100至29199点同29200至29299点呢两个100点范围慨熊证已经无咗，不过呢度夹埋都只系得63张期指啫，反至29300至29399点呢1146张期指，变成依家最近同最贴价慨街货堆。假如恒指再向上跳多吓，分分钟食晒都唔奇，更何况有食唔食，真系罪大恶极。
至于牛证呢……唉……本来最近慨距离又变得最遥远啦，最贴价慨28800至28899点同现价(11点34分报29244点)有444点差距，呢个点数确实唔多“老黎”，但今日一计又似乎系向上行有着数；不过刚啱造淡试水温变成烚熟脚，都系抖抖先。
无论买咩都好，建议轮行先，因为无打靶位就可以避免好似今日咁一开即死慨危险；就算买远证，都只怕一个唔留神被打死。
作者阿珊，从事财经及投资版报道超过10年，由平面媒体走到网络世界。相信技术分析，由窝轮到牛熊证无一不炒，唔贪心，志在揾餐下午茶。
