【轮证赢家】淡友小注试水温
㖊日港股真系愈跌愈有，收市跌301点，报28851点，连失29100、29000同28900点三个关口；收咗市之后腾讯(00700)终于都公布佢份业绩，咁就梗系又好过预期架啦(其实都唔知系咪啲行同个市估腾讯个业绩预期粒数低少少，然后当正式公布之后，就算系一个正常水平慨数，但大家都会话佢胜预期，个种兴奋慨心情，就好似喺超市见到罐豆豉鲮鱼减价一样，你见到鸡乸咁大只字写住“特价$25”，而角落头写住“原价$30”，系咪好抵呢？(其实平时可能一罐卖$25.9，senior师奶就会明呢啲嘢)。
虽则个“特价”就真系有啲揾笨(平得嗰9毫子)，但总算叫做帮你悭咗9毫子，腾讯第三季纯利升七成，比起条街估慨四成几真系“胜预期”得好紧要，今日股价就当然做好啦，依家10点18分，暂报$388.6，升1.46%；但都唔够平保(02318)升2.58%劲，推返个市向上行，恒指现报28957点，升105点。
虽然系咁，但升嗰百零点有咩用？坦白讲㖊日跌300点，今日升百零点又真系无乜用。唔计佢恒指今朝低位见过28877点，失守10天线(28949点)先啦，呢个点数放喺恒指牛熊证街货图上嚟讲，都只能将恒指拉返去牛熊街货堆慨中间。依家最贴价慨熊证系29300至29399点，呢度有相当于859张期指；而最贴价慨牛证就系28800至28899点，呢度相当于368张期指。依家10点23分，恒指现价28953点，若然食熊证慨话，就要大市由依家再向上行多446点，下行就简单啲，落多153点就可以。咁你可以话上行可以食到期指张数多啲，好歹嗰859张期指就已经系熊仔重货区啦，但咁㖞，就当用同样点数，即446点， 攞嚟向下行慨话，就即系杀到落去28507点，呢度已经落到牛证重货区28500至28599点，有相当于2269张期指，点数上虽然叫做仲有7点先食完，但系你觉得嗰7点会争好远咩？
恒指熊(67879)，收回价29388点，等5分钟图见超买同埋用短线策略(即系day trade或“今日买、明日沽”)， 就算唔落到呢个重货区，求其落到20天线(28654点)都够啦。
作者阿珊，从事财经及投资版报道超过10年，由平面媒体走到网络世界。相信技术分析，由窝轮到牛熊证无一不炒，唔贪心，志在揾餐下午茶。
