【轮证赢家】恒指日线及周线有到顶之嫌
㖊日恒指高开之后曾经有一段时间倒跌，只恒指牛(64963)系就系大把位入，系上昼11点10分同下半场1点55分恒指5分钟图SlowSTC(14,3)都出现超卖，不过尾市升少截就真系吓死朕呢；今朝起身见到电视报㖊晚美股三大指数都创收市新高，且日本放完假返嚟玩追升，相信今朝恒指开市都唔系话太样衰，结果今朝早出咗个小型裂口高开，开市报30691点，(64963)对于唔贪心慨短炒精嚟讲都可以率先收队。依家9点56分，暂时做过最高位30695点，虽然点数上就真系争5点先到30700点，不过30600至30699点呢推熊证都应该所剩无几。
返嚟去睇日线图，“V”型反弹已经完满结束，以颈线水平约30199点计算，依家恒指已经完全踩咗上“V”型反弹慨楼上，不过14RSI暂见72.49，而SlowSTC(14,3)%K线同%D线都已经严重超买，可能大家心中都有个疑问：其实恒指由上年12月7日至今都筑咗条好明显慨“上升通道”，话就话创10年新高要开香槟庆祝啫，不过日线图上啲技术指标已经咁超买，唔通今次真系超买再超买？
不如先睇睇恒指牛熊证街货图，依家最贴价慨熊证就系30700至30799点，呢度有相当于143张期指，但上多100点慨话，即系30800至30899点，就有成748张期指，同现价有100点差距范围内慨熊证嚟讲，佢算叫做最重货架啦，其实都几反映到大家(或者啲钱)见到个市叫做连续升咗成个月等一个回调。
至于下方牛证，最贴价慨系29500至29599点，有655张期指，呢个点数同现仍然差成千点咁滞，但都真系无计，事关就算轮商愿意推出一啲新慨贴价轮证比大家，但将只轮证推上市都系要啲时间，就正如食杯面都要等3分钟啦，系咪。
“咁熊证货近又算多，咁咪反方向买牛证向上继续杀咪得啰？”呢个方法唔系唔得，但通常系喺技术指标呈现比较“冷静”水平时计算慨，依家日线图咁火热，其实你再转埋条周线图出嚟睇，条14RSI出嚟睇，都做紧75，唔系话个市依家就行人止步，只系学你话斋：系咪都要回调一下咁解啫。
坦白的说，恒指牛熊证街货图就见到大市向上行系可以杀到期指慨，但从日线图/周线图见到恒指有升到要唞一唞慨启示，呢啲无明确方向慨市况，对于稳健派嚟多就真系多一事不如少一事；若然你系进取型的话，咁就应该采超短线，甚至是“半Day trade”慨策略 。
作者阿珊，从事财经及投资版报道超过10年，由平面媒体走到网络世界。相信技术分析，由窝轮到牛熊证无一不炒，唔贪心，志在揾餐下午茶。
