【盘房来料】取腾讯弃阅文等易鑫
欧美股市上周五表现一般，不过科技股表现较好，港股今日略为低开，恒指二万九点企定定，又倒升再创近十年新高。恒指半日最多升137点，高见29258点，其后升势回顺，半日报收29198点，升77点。可惜国指跟唔上，即使上证指数上升，但国指跑输跌34点，半日报收11711点。除咗腾讯(00700)升逾1%带动恒指上升，友邦(01299)创65.35元新高，半日升5.2%亦撑起大市。
花旗嗰边科技股表现强劲，港股亦如是，瑞声(02018)得到多间大行上调目标价，瑞信最牛睇214.5元，众多大行齐祝福下，瑞声再创185元上市新高，升幅超过一成，半日报收179.9元，升6.2%成为最大升幅成份股。瑞声咁慨走势，破顶后又升上太空，睇嚟变双红底股系迟早慨事。至于舜宇(02382)阿Man上次都贴佢入蓝筹，偏偏上次季度调整畀万洲(00288)打尖行先一步，但话咗恒指成份股要添加科技工业元素，舜宇今次顺理成章染蓝，股价亦破近高见148.8元，半日升6.3%报收146.9元，睇嚟150元呢个唔算系心乜嘢目标，即管睇睇大行几时再祝福舜宇及调高其目标价。
话咗科技股厉害，除咗一对手机设备股龙头，半导体股继续强势。阿Man上星期指出ASM太平洋(00522)批完股唔死得，公司之前早有计划回购，又批又回购系古怪咗啲，但股价批完稳守唔死得就必有后福。好彩阿Man叫大家要睇实，批完唔死随时再创新高，果然短短几日股价急成一成再创130.6元新高。其他半导体股续有追捧，但阿Man唔建议追货，坐定定一见回头要食糊。
恒指服务公司除咗将舜宇染蓝，碧桂园(02007)亦获纳内成份股，但裂口高开逾一成后，升幅收窄至7.8%，高开低走好消息出货。至于其他内房股个别发展，呢期内房股只系反弹未转番强势，见好即收无乜点错。要博其他变动咗慨指数成份股，不如睇番众安(06060)同鸿腾(06088)，虽然两股都系高开低走，但两股获纳入恒生综合大中型股指数，意味住好快加入“港股通”，一旦北水起势扫货，股价闲闲地升两三成，现价收集都系睇番前高位，鸿腾止蚀位摆4.9元，众安跌穿75元松人。
新丁雷蛇(01337)今早挂牌，开报5.12元，盘中曾高见5.49元，一度较招股价升逾四成，但其后急回至4.61元半日低位，中午报收4.79元，始终唔系腾讯亲生仔，只系超人红颜知己睇中慨小鲜肉，升幅自然远不及阅文(00772)。缸边友贪新忘旧，除咗今日雷蛇上市，星期四又到易鑫(02858)登场，阅文持续回吐，今日失守百元大关。讲真阅文急升完回吐好正常，话咗唔炒住，想买阅文倒不如买腾讯更实际。
麦狄文
(徐狄怡‧证监会持牌人
