【轮证赢家】恒指牛仍采短线操作
上个星期用返恒指街货图嚟睇市，最后都系选择买升，拣咗两只适合做短炒慨恒指牛(68069)同恒指Call(15541)；今朝恒指开市报29058点，跌62点；但都未得闲理佢住，事关系U盘做紧时，我同战友Jack处理紧只雷蛇(01337)。坦白讲我好少玩IPO，无特别原因，纯粹因为个人运气比较差慨问题，十抽其九都唔中，只系呢期IPO热确系锐不可当，顺便试吓自己运气。
行到返公司楼下时，应该9点50分到啦，战友Jack WhatsApp我话恒指倒升；10点松啲返到埋位，恒指喺10点6分报29187点，升66点，拆开恒指5分钟图见到今朝最大个支烛，期后恒指以“圆顶”姿态行走；同个同学阿Milk讲完佢公司只app有bug之后，依家10点17分，恒指做紧29207点，点数上无咩太大改变，就用呢口价再开恒指牛熊证街货图计计数，就算到今日暂时高位29258点计，其实恒指都只系踩入咗熊证最贴价慨范围29200至29299点，呢度有相当于292张期指，而见到上日走咗525张期指，摆明贴熊证上个星期五(11月10日)见市跌+势色不对就走为上着。啱慨，落场唔好话无父子，咩情都无得讲。再上多100点，即29300号型29399点，呢度有相当于1398张期指，系熊证重货区，唔用计数机都知道恒指现价同呢个重货区非常接近啦。
再睇埋下方牛证，最贴价慨系28600至28699点，呢度有相当于169张期指，而再落多100点，都系属于第二梯队，就系牛证重货区，有相当于1567张期指，但呢个位就系28500至28599点，同现价差成707点咁远呢。
恒指牛(68744)，收回价28558点，同现价有逾600点差距，约47倍杠杆不过不失，成交活跃容易出入先系重点嘛，但仍然采取短线策略，因为去到星期三(14日)腾讯(00700)业绩后都唔知会唔会见光死。
作者阿珊，从事财经及投资版报道超过10年，由平面媒体走到网络世界。相信技术分析，由窝轮到牛熊证无一不炒，唔贪心，志在揾餐下午茶。
