【盘房来料】腾讯下周业绩前仲好安全
港股㖊日经历咗小奇迹日，恒指早段插水600点后，午后几乎收复全部失地，形成单日转向之势，承接隔晚美股三大指收又创收市新高，港股今日做好，创近10年新高。恒指今早高开118点，见28715点就系半日低位，其后喺腾讯(00700)腾飞带领下，再升逾300点，半日最高见28960点，中午报收28943点，升346点；国指则升138点，报收11663点。
㖊日阿Man喺盘房来料已讲咗，虽然上半场急剧震荡，又落到28100附近，但半日成交增加，反映有资金趁震仓入场。话咗恒指唔失守移动区间底部，阿Man都系睇上唔睇落，一早讲明只要升穿28600，个市一定向上挑战今年高位。皆因腾讯除咗分拆热爆新丁阅文(00772)上市，嚟紧下星期派成绩表，紧接又到另一只佢有份慨新丁易鑫(02858)招股，利好消息一浪接一浪，加上之前已提示，一旦股价企稳350元，升势将会转急，目标价系380元至400元，估唔到今日又创389.6元新高，由350元升上嚟现水平，前后不过四个交易日，一只重量级巨无霸能够升一成，已有晒交代。
唔少粉丝都问阿Man，究竟腾讯睇几多，咩价位要落车，几时要食糊。阿Man一向都系嗰句，穿顶唔估顶，腾讯升穿晒顶，虽然前设目标价380元至400元，已开始进入射程范围，但腾讯有几本事，可以升到外太空咁远，呢啲系无法估计，暂时只可以话下周三派成绩表前，都系腾讯慨安全期，易升难跌，大涨小回。
其他重磅股亦做好，平保(02318)再创新高，企稳70元再向72元至75元目标出发，半日最高见72.35元再创新高，半日报收71.95元，升1.6%。其他内险股都做好，阿Man两周前推介慨人保(01339)，再创4.26元今年新高，半日升5.5%。内银股㖊日打个冷震，今日又醒神番，加埋三桶油再随油价上升，只要呢啲重磅板块维持强势，大市要升破二万九无难度。
之前讲过大市要破顶，除咗腾讯之外，仲要港交所(00388)同埋大笨象(00005)发力，港交所半日升1.6%，股价靠稳225元再上，但慎防上次高位230.6元升唔穿，明日业绩后可知行人止步，或再创今年新高。至于大笨象业绩后无惊喜，股价未能重返76.5元之上，暂时都系咁款，不过腾讯升埋佢嗰份，呢一段升浪大笨象出力与否，大市仍有条件挑战二万九。
麦狄文
(徐狄怡‧证监会持牌人
