【轮证赢家】都话爆单边架啦！
上个星期五(11月3日)拣咗只杠杆偏高慨恒指牛(67099)出嚟用嚟短炒，但见到就算恒指5分钟图上SlowSTC(14,3)有超买同超卖位比你做出入位，见到个点数都无乜点郁之下，都feel到个市有啲唔开胃；反正自已条题都写住“等爆单边”，既然大市横行到咁慨时候就等吓添啦。结果今朝早先嚟个头盘，开市升12点，头盘之后就更系到Main Course啦，你见恒指5分钟图个支大阴烛就知道个Main Course有几饱，就单计呢5分钟，恒指最低做过28295点，都已经跌咗308点。
依家10点41分，同战友Jack分享完喺屋企楼下街市买够60蚊有嘢送，同埋分享咗我老妈同佢班阿太朋友去曼谷行街市时，阿太A一踩入夜市就被人秒偷咗部电话个呢啲师奶行情同八挂之后，个市连甜品都食埋，10点25分恒指做过暂时慨全日低位28137点；依家暂时睇落就有跌定慨迹象，而SlowSTC(14,3)同MADC都同步见底回升中。
依家10点45分，恒指现价28212点，跌紧391点，就用呢口价嚟计数。恒指牛熊证街货图上其实都有啲估唔到个市会突然下行，事关如果用同样慨跌幅点数计慨话，即28603(上星期五收市价)+391(暂计恒指下跌点数)=28994点，呢个位度喺恒指牛熊证街货图上慨话，就即系食咗熊证最重嗰part街货，即28800至28899点嗰1570张期指，计埋前面两个100点范围慨货量的话，total食到2348张期指。睇返目前实际情况，恒指低位28137点计，即去到28100至28199点呢个范围，呢度有相当于563张期指，就算计埋今朝咁样向下杀慨货量，其实total都只系得342张期指，就算当28100至28199点呢个范围嗰563张全数吞埋，都只系得905张期指。
从恒指波幅指数(VHSI)估到大市即将出现爆单边慨情况(今日VHSI裂口高开添)，但估唔到会向一个比较远且货量相对少慨牛证爆落，若然是捉心理的话，先知道依家牛证最贴价变成28100至28199点，而重货区28000至28099点嗰1712张期指就变成第二重货区，今日一跌不知有几多资金买贴价牛博反弹；但若然明日再跌，唔多呀，就当你27999点好未，先系穿过条保历加通道底(28072点)，跟住28000点呢个关口又无埋之余，可能比今日更多慨牛证被大户食埋，呢个动作基本上可以一个朝早做完，下半场有下半场慨另一个世界……
以上都只系纯粹系一个推测啫，如有雷同就梗系实属巧合啦；至于今日就……一个朝早都做个成日市咁滞，唞吓啦。
作者阿珊，从事财经及投资版报道超过10年，由平面媒体走到网络世界。相信技术分析，由窝轮到牛熊证无一不炒，唔贪心，志在揾餐下午茶。
