【轮证赢家】临收市先开工
今朝10度都无慨情况之下爬起身返工，除咗想死之外我都真系无咩好讲，仲要证明比我老妈睇我同老爷今日系扎糭返工，于是系湾仔站一落车就揾个位企定定咁自拍，然后send比佢；Well，学阿Jack话齐：“养儿100岁，长忧99”，嗯，老妈，你几时send返张自拍比我，证明你都扎糭先？
依家10点14分，恒指似乎都同我一样扎咗糭，依家报30950点，升50点，最高做过31001点，咁梗系啦，正如㖊日所讲，31000至31099点呢个又贴价又重货慨熊证，个市唔吼住就奇啦，今日大市再次表演“一点穿心”，穿晒呢堆熊证慨心，连同30900至30999点嗰297张期指，开市一个钟唔够个市就食咗1253张期指，呢个早餐真系丰富过all day breakfast。
再向上睇吓熊证，依家变相最贴价慨系31100至31199点，呢度有相当于504张期指；再上多100点慨话，即系31200至31299点，呢度都有571张期指，虽然就未及过千张期指咁吸引，但已经系熊证第一同第二重货区架。
又睇睇下方牛证，最贴价慨系29900至29999点，呢度有相当于508张期指，见到个收回价近咗咁多就知道发行商无偷懒啦；至于最重货就系29500至29599点，呢度有1102张期指，以依家10点37分恒指报30944点计，呢个位同现价都有成1444点距离，实在是too far away啦。数返近少少，系29800至29899点，其实即系第二贴价区，就有相赏于802张期指，都系第二重货区，但系就算用呢个位计，都同现价有成1144点差距。坦白讲，话就话恒指日线图啲技术指标都超买或严重超买啫，之但系上方熊证虽则唔系重货，但胜在近嘛。
拆开恒指5分钟图睇，似乎呢两日恒指个走势模式都系朝早开市嗰吓“boom”一声弹起咗之后就开始回落返，当补完“boom”嗰吓慨上升裂口之后回返少少跟手就横行直到收市。依家10点44分，恒指今朝又系“boom”一声上咗去之后就向下行，补咗今朝个上升裂口，依家又回返上去，唔知下半场会唔会横行至收呢？如是者倒不如趁临收市前半个钟先至落场，博瞓醒第二朝“boom”嗰吓嚟收割。恒指牛(67236)，收回价30050点，同现价有逾900点差距，依家坊间最贴价慨牛证收回价去到30515点，不过今次策略系小注过夜，所以拣只远啲慨牛证比较稳阵。
作者阿珊，从事财经及投资版报道超过10年，由平面媒体走到网络世界。相信技术分析，由窝轮到牛熊证无一不炒，唔贪心，志在揾餐下午茶。
