【轮证赢家】个个都入市，唔通个个都想入市？
历史性慨一刻终于都出现啦，就系恒指升穿咗2007年10月时创下慨高位31958点，㖊日恒指以高位31983点收市；咁都仲未够，今朝恒指再弹多165点开市，开报32148点；依家9点56分，恒指最高见过32233点，11只蓝筹创52周新高，唔好话恒指牛(64153)，求其入只牛证/Call轮你都丰收。
呢啲时间最例牌就系做“头仔”(街访)访问，问吓老散点睇后市，总会有人继续睇好或者觉得大市升够，有货慨就揸住唔想放，怕放咗就买唔番；无货慨见到个个都好似赚到盘满砵满咁，唔入番少少又好似好蚀，但依家先嚟入货个心又15/16，怕自已接火棒；再罗罗挛多一阵又怕个市又弹咗上去，唉，真矛盾。
唔好理人哋住，望返个市先，创完历史新高之后，恒指牛熊证街货图的确好唔同，今日见恒指牛熊证1000点差距期指张数比例系51：49，即系开始进入牛熊角力慨时候；再睇埋上方慨熊证，依家10点5分，用恒指最高做过慨点数32233点计，换言之依家大市踩入咗32200至32299点，呢度全区有相当于393张期指，亦即系话今朝个裂口上升就杀咗由31900至31999点，至32100至32199点呢三个100点范围慨熊证，呢度夹埋有相当于755张期指，对于呢期火红火绿慨大市嚟讲，根本等同一个十零蚊慨烧卖早餐。
开得个街货图就不如睇埋下方慨牛证啦，最贴价慨系31200至31299点，呢度有相当于1023张期指，以依家10点13分恒指报32106点计，即使讲系最贴价，但同现价都有906点差距。大市开始面对一个两难问题：上行路近但货少；下行路远但货多。
今朝同老爷坐地铁，我同佢讲：“穿32000点啦！”然后佢玩住candy crash同我讲：“呢啲时候小心啲呀！”依家10点47分，睇咗个市都成粒钟有多都仲未睇到个方向，转恒指波幅指数睇反而见到“倒T星”出现，唔通今次慨大波幅就咁就完？反正恒指刚刚创历史新高，生完仔都要比个大肚婆回吓气架，呢个情况都系做观众好啲。
作者阿珊，从事财经及投资版报道超过10年，由平面媒体走到网络世界。相信技术分析，由窝轮到牛熊证无一不炒，唔贪心，志在揾餐下午茶。
