【轮证赢家】睇定啲先啦！
㖊日恒指再嚟多次创历史新高，见32233点，不过裂口高开之后，拆开恒指5分钟图睇，竟然出现一浪低于一浪慨形态，仲系朝早11赔半到就已经补咗朝早开市个裂口，下行慨情况持续，至咗下昼两点钟到，恒指倒跌不得止，仲做咗全日低位31869点，好彩，低位过后钟摆再次向上，收市时都叫做爬返上32000点，不过日线图见就一粒“十字星”走咗出嚟啰。
“十字星”就代表转势，即系话有机会由本来慨升转为跌啦，“吓？啱啱先创完新高咋㖞！咁快又话要跌？”唔好一听到个跌字就咁惊啦，就算系“大涨”，中间都会有“小回”慨情况出现架嘛；更何况恒指日线图上啲技术指标几乎全数超买再超买中，假设后市真系想上到39000点(打个比喻)，系咪都要令个市冷静一下之后再升会比较健康同合理？都系嗰句：超市减价都可以会mark高少少先至再加个减价牌，令到唔常去超市格价慨师奶们有一种感觉系“好抵呀！”，然后就将件货摆落架车仔度。
再睇恒指牛熊证街货图，上方熊证数量真系寥寥无几，依家10点9分，恒指现价32082点上方最贴价慨熊证系32200至32299点，呢度有相当于99张期指，同现价比相差217点；如果再上多100点慨话，即系32300至32399点，呢度就有相当于425张期指，数量系多啲，不过讲嚟呢425张期指已经系熊证慨第二重区，第一重区货讲紧系32500至32599点，但呢度都只系得588张期指。
至于下方牛证就真系大把货，一睇就见到有三个过千张期指慨街货范围系度，最重慨系31200至31299点，呢度有相当于1591张期指，亦系重货区no.1，咁当然同现价比较慨话(用返10点9分mark底嗰口价32082点计)，同现价有882点差距，与此同时，如果大市真系下行到呢个位嚟食最重牛证慨话，佢首先要跌穿10天线(31494点)先。
明白市况系强，作为老散系要敬畏市场；之但系大市再上升慨力度始见有减弱迹象，再加上VHSI爆升过后都回落，意味大市波幅又再度减少，系未见明确方向同波幅可图慨情况下，即使恒指唔下行，但横行慨机会仍然存在，对于要面对时间值损耗慨轮证嚟讲实在唔系咁着数，建议继续壁上观。
作者阿珊，从事财经及投资版报道超过10年，由平面媒体走到网络世界。相信技术分析，由窝轮到牛熊证无一不炒，唔贪心，志在揾餐下午茶。
