【轮证赢家】无嘢好玩玩吉利
企咗系金鱼缸出面两日，系就系见住个市日日创历史新高，这边厢考虑到恒指日线图同周线图都超买得好紧要，在钟摆理论的“花无百日红”的基础认知下，有感港股目前或已见顶；但与此同时恒指每日都创咗个历史新高出嚟㖞，对于要选择“40000点不是梦”还是“一股不留”，确然系两难。
当然，你可以话睇牛熊证街货图睇下有无破绽慨，依家10点36分，帮班同事出完淘宝货计埋运费之后，恒指都仲系见红，不过跌1跌，做紧32253点。用呢口价计数，上方熊证最贴价慨系32200至32299点，呢度有18张期指，留意番，今日恒指暂时最高见过32297点，换言之呢个位置慨期指其实都被食得八八九九，要睇慨就上多一级慨32300至32399点，呢度有476张期指，只系属于第三重货区；至于最重货慨就系32500至32599点，呢度有648张期指，系呀，就凭呢600几张期指佢成为咗重货区。
再睇埋下方牛证，最贴价慨31400至31499点嗰堆牛证有相当于408张期指，同现价比有成853点差距，而重货区就系31200至31299点，呢度有相当于1228张期指，同现价比慨话讲紧过千点慨距离。用呢个位放上恒指日线图慨话，讲紧要落返去10天线(31646点)同20天线(30915点)慨中间，走势上，连上年12月7日筑到依家慨“上升通道”都要断埋。“为嗰个千几张期指而输咗个咁靓仔慨走势，值得嘛？”讲得出呢句说话慨，你应该系相信“40000点不是梦”慨粉丝。
Well，唔系话个市无可能见40000点，但当市变得愈来愈难炒但又认为个市系要托住系呢啲高位慨时候，好自然就会开始揾一啲追落后慨股份出嚟郁，揾落后股其实都系由一线开始向下揾，一啲呢期成日撞口撞面慨如腾讯(00700)同平保(02318)就可以悭返唔驶睇，内银、国寿(02628)、港交所(00388)同埋啲证券股上个星期先炒完，可以悭返；至于本地地产股方面，相信要“小阳春”杀到嚟先有睇头，更何况走势上都唔系好落后啫，濠赌股发力中，资源股回紧气，谂嚟谂去，都系得返车股，当中比较靓仔慨系吉利(00175)
“吉利个日线图衰到无朋友㖞”，啱啰，我就系要揾样衰慨等佢变Oppa嘛，所以你见呢三日都穿过条100天线(25蚊)，而日线图慨走势上见到条“下降通道”有跌定横行慨迹象，呢两日又刚好落到落保历加通道底且保历加通道其见打横，未见拓阔，而日线图上慨技术分析SlowSTC(14,3)慨%K线同%D线分别得8.659同12.96，系争条14RSI见39.16嫌佢未够低，吉利Call(29277)，行使价25.3元，2%价外，街货有逾30%系多咗啲，不过胜在高杠杆、低引伸㖞，试吼5分钟图见超卖小注入落场。
作者阿珊，从事财经及投资版报道超过10年，由平面媒体走到网络世界。相信技术分析，由窝轮到牛熊证无一不炒，唔贪心，志在揾餐下午茶。
