【轮证赢家】美女与野兽
㖊日恒指又系临尾发力，连续第四日创历史新高；基于有啲怯大市呢啲“超买再超买”慨情况会突然“Boom”一声玩完，于是拣咗只极度样衰慨吉利(00175)出嚟，终于等到下半场3点25分到，见吉利SlowSTC(14,3)踩入超卖区，顺利地将只吉利Call(29277)小注落场。今朝早见恒指再创新高，开市升212点，见32606点，到正式开市之后更曾升逾300点，见过32700点楼上，吉利亦由我行紧返公司时见到升3%，而战友Jack就话我只(29277)升25%；到我返到公司10点到吉利升逾5%，而(29277)更爆上升58%，只Call升到咁，唔使教都知道系收割慨时候啦。
同老妈系Whatsapp吹完两句水，再上埋老友魏力条文之后，依家10点34分，恒指升230点，做紧32623点，最高做过32729点，用呢口价放落恒指街货图上，就知道今朝恒指已经杀入32700至32799点呢个熊证区，呢度有相当于417张期指，亦由本来第四贴价区变成依家最贴价慨熊证，而佢对落慨32400至32699点呢三个100点范围，total嗰1312张期指，好明显已经变成咗大户今朝慨早餐。
至于下方慨牛证，最贴价慨都只系31500至31599点，同现价确系仲有成千点距离。坦白讲如果牛证同现价慨差距keep住有800几点至过千点慨距离，而同时上面熊证都keep住有几百张期指驻守的话，为咗要凑够期指张数，似乎都只能将个市继续推高，向上食熊证；咁就暗示大市将会继续创新高，分分钟创到你班友仔麻木为止。(系唔健康架，但个市要咁行，吹咩？)
不过，都系嗰句：要大市升都要比啲动力，而动力就系嚟自股份升。㖊日只吉利今日走势上日线图SlowSTC(14,3)%K线底低升穿%D线，兼升穿埋条“下降通道”，坦白讲追多日都唔怕，不过要预咗今日先起步追慨所得未必如㖊日追、今日收割慨咁多；仲有(29277)已经㖊日慨轻微价外变成今日慨价内，所以要转过第二只轻微价外Call，吉利(19922)，行使价26.9元，价外约2%，引伸偏低、杠杆适中，且成交活跃，属考虑之选。
另外一只“野兽”估计会系全世界都唱紧资源股今年会翻生慨昆仑能源(00135)，由1月3日开始至今筑起“下降通道”，日线图SlowSTC(14,3)慨%K线同%D线双双跌到得返个位数，依家10点55分，昆能暂时升0.4%，报7.68元，若然明日一，唔贪心就当佢弹一到上条10天线(7.825元)，讲紧同现价升1.9%，如是者同现价有约2%差距慨昆仑Call(11453)就真系fit到爆，(11453)行使价7.38元，高杠杆低引伸亦系另一卖点，唯一有啲担心慨系昆仑属于较二三线轮， 冷门嘢都真系唔好预咗成交好活跃，你愿唔愿做“美女”一次，博呢只“野兽”明日会见技术反弹变“王子”，就要视乎今日有无靓位比你入啦；重点系，“美女”都系唔应该赌钱，所以小注怡情好啦。
作者阿珊，从事财经及投资版报道超过10年，由平面媒体走到网络世界。相信技术分析，由窝轮到牛熊证无一不炒，唔贪心，志在揾餐下午茶。
