【盘房来料】合理调整令后市发展更健康
隔晚美股科技股独强，道指微调，但标指跟纳指再升，以为隔晚ADR咁强劲上咗三万三，港股今日又嚟料，当全世界都抱住同样预期，咁多数都系天气不似预期。港股今日确系再创新高32981点，但跟三万三仍有啲距离，半日都系报跌收市。
恒指低开23点，曾倒升最多50点，见32981点再创新高，不过未能一举冲破三万三点掉头回落倒跌，盘中最多跌202点，见32728点，其后收复部分失地，跌幅收窄。恒指中午收报32837点，跌92点或0.28%；国企指数报13497点，升7点。
四大股王终于今日齐齐过堂，而呢两日强势慨内银股亦见回吐，腾讯(00700)暂跌1%，半日报收470元，升咗咁多回一回都好正常。至于差一步见红底慨平保(02318)，㖊日已经以阴烛收市，今日跌系意料之内，半日跌2.2%，唔知午后能否收窄跌幅。港交所(00388)亦跌失1%，暂时险守300元，不过今年大牛市，兼且成交keep住有增无减，港交所回深啲就系捞货好机会。而大笨象(00005)近几日已唔多识郁，不过今日又唔算回得多，股价半日跌近0.3%，报收85.45元。奇怪系每晚ADR时段，大笨象都企稳86元之上，而喺ADR交易慨，当然系机构投资者，仲要系外资，既然有大孖沙肯晚晚畀多成蚊买货，后市仍可睇高一线。
油价持续上升，纽约期油更创下超过3年新高，油价带动下，三桶油全线向上，中石油(00857)跟中石化(00386)升逾3%，反而阿Man较睇好慨中海油(00833)仅升1.8%。不过三桶油升幅远远不及油服股，中海油服(02883)发盈喜，去年可扭亏为，半日升近6%，其他油服股闲闲地升一成或以上，整个板块起动，摆明系强势股抖气，资金转追落后。
至于阿Man今年睇好慨医药股个别发展，升得多慨龙头普遍回吐，但中国中药(00570)跟润药(01515)等逆市上升。至于中证监唔批准康宁医院(02120)回归A股上市，股价急挫近两成，其后跌幅收窄至11%。阿Man建议不妨留意远大医药(00512)，此股晒士近百亿，相当合北水脾胃，一旦获纳入港股通，股价可以升到你唔信。
港股今日回调，未知今早32981呢个系咪短期顶部，话晒升越2007年高位31958后，已再升千点，大市开始调整唔出奇。不过呢几日期指开始转仓，预期较大幅度慨调整唔好咁快出现，至少呢个月能否再挑战三万三点唔敢讲，反正大部分指数权重股已进入无阻力区，一旦资金再涌入扫货，港股再下一城有几出奇。目前大市都系以大涨小回姿态运行，觉得累计升幅大想减磅唔反对，至于要做淡友，并大叫牛转熊市股灾在即，喺目前未有重要利淡消息，兼且唔见转势慨时候讲呢啲，真系人唔笑，狗都吠。
麦狄文
(徐狄怡‧证监会持牌人)
