【轮证赢家】睇定啲先
㖊日恒指尾市好似凭住最后一啖气，冲咗上去33018点之后就掉头，收市时落返去33000点楼下。而㖊日推介慨恒指牛(69126)系上半场11点15分，适逢恒指5分钟图SlowSTC(14,3)见超卖，于是小注落场；承如㖊日所指“见到恒指又‘创新高’慨话就好收手啦，乜你唔觉呢期恒指‘创新高’完就好兴回落啦咩？”系啰，㖊日恒指穿33000点时讲紧只系3点半到，有成半个钟头比你走货，咁你都唔走就真系咪鬼怨人。
恒指今朝先开出阳烛，开市报32979点，升21点；依家10点钟，恒指已经由升转跌，做紧32831点，跌127点，大只蓝筹就更系见红啦，不过正因国际油价上紧高位，事关沙特阿美石油公司原嗌上市虽然嗌咗好耐都仲未搞掂，但堂堂咁大间石油企业，上市定价一定唔系一个几毫呢啲size啦；再加上美国总统特朗普反环保分子，唔用石油唔通用天然气咩，系咁慨情况之下油价有乜可能唔发围先得架，又that's why小妹推完吉利(00175)再推昆仑(00135)，㖊日见恒指单脚企系个顶度都唔知会唔会累街坊，于是拿拿声揾位走只昆仑Call(11453)，为求明哲保身；谁不知今日只昆仑逆市曾升逾3%，(11453)喺10点9分升45%。都系嗰句：昆仑轮呢啲冷到爆慨轮，真系唔可以用揸正股慨心态去对待，万一甩辘就真系喊都无谓。
睇返今日个市，老实讲恒指日线图上由上年12月初至今呢条“上升通道”靓到无仇报，但同时技术分析条线都系咁捉向上，今日一跌终于见到恒指慨技术分析有耷头慨迹象；不过都要比个面望一望恒指牛熊证街货图，睇吓恒指系咪真系有个“下台阶”。
依家10点20分，恒指报32715点，跌242点，最高做过32998点。上方熊证最贴价慨33000至33099点有相当于65张期指，而再上多100点，郎系33100至33199点呢度，就有相当于467张期指，呢度唔系重货区(重货区系33500至33599点，但讲紧都只系得545张期指)，熊证货量愈嚟愈唔吸引慨目的只有一个：啲钱博大市超买再超买后出现调回，于买近熊，由市就系咁升，由买近熊变远熊都搞唔掂，输到连底裤都无埋，咁你话仲边度有钱敢买熊？
下方牛证最贴价慨系31900至31999点，呢度有相当于2034张期指，绝对系牛证重货区，而呢个位置同现价就有815点慨差距。同样地牛证所谓慨贴价讲紧都有成800点差距慨原因就得一个：市上得太快而新轮证未出到咁贴，呢样嘢你又无得怪轮商，事关要推一只新轮证出嚟时，其实佢都要经过上市呢个过程，就算转用Call轮买升，轻微价外个啲讲紧都要成三毫几子，重到都唔识跳咁滞。
理论上，恒指连升七日又上埋33000点楼上，点都要抖一抖，呢个表面证供绝对成立；但背后熊证同现价近，唯一麻烦位只系唔够货；今日一个几百点慨下行会唔会系引番啲钱入熊证用嚟储货再食呢？今日都系收一收手睇定啲先再作决定。
作者阿珊，从事财经及投资版报道超过10年，由平面媒体走到网络世界。相信技术分析，由窝轮到牛熊证无一不炒，唔贪心，志在揾餐下午茶。
