【轮证赢家】Chok死人咩
㖊日话湾仔沙中线个地盘又有炸弹，警方疏散附近慨人，我想讲其实由我公司行去嗰地盘都只系10至15分钟慨路程(可能可以再快啲，只系我矮>脚短行得慢)，点解疏唔到我哋呢边呢？(说穿了就系博有得早走)
湾仔个炸弹就有警方慨拆弹专家慢慢拆；咁呢个升到开始有大行同股评人讲话会回调慨港股，只弹又边个嚟拆？讲真，可能好多人根本就唔想拆，事关一拆慨话，手上慨货同化为乌有无乜分别，顺便又似系一个合理慨说法去解释㖊日恒指出现单日转向，㖊日只恒指熊(61386)几乎命丧，策略上仍然采恒指5分钟图见超买时落场，而系朝早约11点半开始，至下半场1点5分到，恒指5分钟图SlowSTC(14,3)都keep住系超买，(61386)大把时间落场。Day trade嚟讲，喺同日下昼1点35分同埋2点25分恒指5分钟图SlowSTC(14,3)由超买变超卖，(61386)已经完成咗佢慨使命，以落场时段慨高低位0.047同0.032拉个平均数，0.0395当作为买入价，再以出货时段慨高低位0.066同0.051慨平均数0.0585作为卖出价，计落都有48%水位㖞；就算斩头斩尾计，点都有两成挂。不过，若然揸过夜慨话，由于(61386)收回价系33000点，今朝恒指开市已经报32950点，话就话一开市chok得高之后会因技术指标升得过火而下行，但中间仲有个step就系跑多两步先识停，就好似跑步运动员咁，冲咗线之后唔系话停就停，个人点都会再向前跑多两步；开市价32950点同收回价33000点只系争50点，唔驶讲都得两个结果啫，都话坚持、唔好放弃系睇情况架啦！
依家10点29分，恒指开始倒跌，但都系跌2点咁大把，今日10天线(32766点)暂时变咗做支持，㖊日升到系威系势慨股份依家见红；而㖊日跌到仆直慨内房今日就有中海外(00688)同润地(01109)破位。依家恒指做紧32875点，就用呢口价计数，上方最贴价慨熊证33000至33099点未死晒慨，事关恒指最高暂时做过33048点啫，将街货图拆细啲，以50点一个范围去睇，33000至33049点(个1点就由得佢啦)有相当于736张期指，叫做系第二重货区架啦，如今无咗，变相33050至33099点呢度就系最贴价慨熊证，有相当于103张期指；至于熊证重货区讲紧系33500至33549点，呢度有1397张期指，同现价比就争674点，计晒沿路慨街货，total有2647张期指。
下方牛证最贴价慨系32300至32399点，呢度有相当于197张期指，现价计就有575点慨距离，若然再落多100点慨话，即32200至32299点，呢度有1090张期指，夹埋上面慨total有1287张期指。
留意返，两边嚟计要行慨点数差唔多慨情况之下，上行可以食到慨期指张数好明显系比下行慨多成倍，配埋个月历睇，业绩期即将杀到，大市借靓业绩再上多浸都唔奇。恒指Call(21423)，行使价33600点，轻微价外兼成交活跃，希望帮补吓今晚同我老妈庆祝生日食饭餐饭钱啦。
老妈，生日快乐！(其实你一啲都唔老，我都仲未可以填你个名落张报税表度)
作者阿珊，从事财经及投资版报道超过10年，由平面媒体走到网络世界。相信技术分析，由窝轮到牛熊证无一不炒，唔贪心，志在揾餐下午茶。
