【轮证赢家】恒指发出“霜冻警告”
呢两日真系冻到无朋友，系咀唇变紫、脚趾长期无血到慨情况之下同老爷去电器铺买暖炉；Well，正确嚟讲唔系买，系抢，事关我落到去慨时候，个哥哥仔已经同我讲所有暖风机/暖炉卖到最后一部display，翻货讲紧系农历新年后慨事，正当我睇紧买边部display时，有个后生仔系我后面，指住我睇紧个部，然后同个sales哥哥讲：“我要呢部”，个sales哥哥都只能对住我苦笑。
另一个sales哥哥走嚟同我讲：“如果你觉得呢部啱慨话，个仓仲有两部新，但得返番一只颜色”，本小姐已涷到七彩咁滞，我理得佢咩色呀，走埋去先知道呢位sales哥哥介绍紧慨就系传说中又系暖风、又系风扇，仲有埋空气清新function嗰部机，盛惠五千二，正当我谂紧慨时候，左边一家三口慨伯伯话：“好啦，买啦”，计计数，吓？个仓入面咪得番一部？右边又有一个啱啱行过嚟睇机慨大叔，唉，老爸金句：“钱解决得到慨问题就唔系问题”有时都真系几啱，“我要一部”呢四个字每只字都过千银，企我左边睇紧个大叔唯有“哈哈”两声；就算用埋老爷系上年公司圣诞party抽中咗千五蚊现金礼券，都仲要比三千几，就算除返开佢三个function，每个都要千几蚊…坦白讲，真系好肉赤，肉赤到我同战友Jack系whatsapp告解(留意返，我都只系一个打工仔嚟架咋)。
咁死贵买部机返屋企，今朝睇电视见到天文台发出“霜冻警告”，个心都开始无咁赤，同时谂住之后勤力啲、努力啲啦，谁不知今朝完咗个U盘之后战友Jack whatsapp嚟同我讲话个市跌886点，我仲以为一系佢打错，一系我睇错，战友又点会呃我呀，今朝真系跌886点架，害到我企系条行冒死拎对手出嚟，send咗三个notification push之后先继续行返公司；依家10点8分，恒指跌幅明显有所收窄，讲紧跌626点，报31975点，20天线(32199点)穿埋，上个星期三(1月31日)时本栏条题大大只字写住“目标：20天线？”嗰只恒指熊若然唔系被之后个两日市chok到呕白泡慨话，我就唔使肉赤紧部机啦！(我知，说话慨嘢又无得早讲慨)
依家10点13分，恒指现报31947点，最低暂时做过31712点，开埋恒指牛熊证街货图睇，由32300至32399点开始到31800至31899点呢一大截慨牛仔全数死亡，夹埋有4554张期指，肥美程度同A5和牛都无咩分别，变相依家最贴价慨系31700至31799点，呢度有177张期指。由于恒指牛熊证街货图其实系隔日数字，所以依家暂时见到慨期指张数一啲都唔多，暂见31500至31599点呢度301张期指叫做重货，好明显今朝杀完之轮之后，大市应该会系度扎营抖抖。
上方熊证最重街货讲紧系33500至33599点，有1392张期指，呢班熊证估计今朝向下杀落去嗰下都已经收割，再买跌慨都会将熊证收回价向前移几级，贴价啲杠杆又高啲呢。
走势上，20天线无埋同时暗示现价已进入保历加下降通道，保历加底等于30835点，50天线就再落啲，系30566点；拆开5分钟图见到恒指虽然低开后有回升，可惜力度唔够，观乎今日恒指跌800几点可能够皮(唔知下半场会唔会失心疯走嚟跌过千)，但都有迹象显示大市往后下行机会较高，恒指Put(21216)，行使价31388点，属轻微价外轮，换股比率10000适中啦，见恒指5分钟图超买先好落场。
作者阿珊，从事财经及投资版报道超过10年，由平面媒体走到网络世界。相信技术分析，由窝轮到牛熊证无一不炒，唔贪心，志在揾餐下午茶。
