【轮证赢家】唔讲轮证讲正股
㖊日恒指支阴烛的确为一众淡友带来一丝丝希望；不过，今朝等紧地铁时就见到战友Jack个WhatsApp：一张腾讯(00700)报价慨screen cap加多句说话“+26？”(升26蚊慨意思)，北角都未到，恒指开报32836点，升182点；10点未到返到公司，开电脑同时又开紧恒指图，呢期我请紧part time妹妹，收慨CV唔多(可能时下年青人有父干，唔使好似我哋以前咁返学做part time)；但量少都唔系问题，份CV都唔好咁甩头甩骨呀…上个网search“resume sample/template/format/examples”总会有份系你喜欢架啦，吓话。
依家10点10分，恒指做紧32819点，升164点，最高价见32942点；开恒指牛熊证街货睇，上方最贴价慨熊证系33000至33099点，呢度有相当于507张期指，再上多100点，即系33100至33199点，呢度就有738张期指，虽然未过千，但都已经系重货区啦。
睇埋下方牛证，最贴价慨系32100至32199点，呢度有相当于366张期指；重货区就系31900至31999点，呢度系属于第三贴价区，有成2227张期指，唔系大家退守㖞，只系发行商出咗啲新慨又贴价慨证上市比大市“选购”，所以贴价排位上会同㖊日有啲唔同。
点都好，呢个格局都由上个月持续至今，愈系超买、愈要上行、愈要食熊证(即使熊证货量唔多)，而今日恒指有力撑多一下，好明显就系只企鹅作怪，今朝U盘升过廿几蚊，到依家10点20分升10.8蚊，唔系佢仲有边个？
恒指呢啲样再Call/牛上去，都系同之前慨做法差唔多，day trade为主；如果揾个股嚟炒慨话，老老实实小妹都揾唔到一只个样唔系超买再超买慨个股嚟再Call上去，除咗港铁(00066)；但认真，港铁等同公用股，波幅有几多大家心照，但睇港铁日线图慨话，SlowSTC(14,3)慨%K线同%D线分别报14.07同9.739，低位%K线升穿%D线，靓仔；MACD慨Div准备由负数区回升上正数区，且MACD(5,26)同EMA(9)齐齐由熊区上行中，仲有升穿之嫌，呢个系第二个靓仔位；14RSI报42虽然miss咗个低位，但形势上早两日已经由低位反弹上嚟：再睇埋日线图上港铁㖊日升穿咗由1月8日到今筑起慨“下降通道”，今日仲努力地上紧条10天线(45.06元)，就算唔买地铁Call，甚至正股，都应该给予少少关怀同支持呀；更何况如果你个仓系准备迎接一个唔知几时会出现慨大风浪的话，仓位组合上有啲高息、公用股作为“石狮子”，进可攻、退可守呀！
作者阿珊，从事财经及投资版报道超过10年，由平面媒体走到网络世界。相信技术分析，由窝轮到牛熊证无一不炒，唔贪心，志在揾餐下午茶。
电邮：[email protected]
放大图片
