【轮证赢家】今日篇文好长呀！
系，大家无估错，我今朝的确又系被人嘈醒，不过系7点几电话响至8点钟我先识得醒，仲要系被台长个Whatsapp响醒(坦白讲我连自己闹钟响都唔识醒)。起身睇番堆Message，美股跌1032点，因为美债息高…嗯嗯，如是者今日成个亚股都见红。恒指今早开市无咗30000点，开报29679点；最低做过 29422点，穿咗条100天线(29602点)。依家10点正，恒指跌够一千点有多，就算你依家先嚟瞓醒，㖊日只恒指Put(21206)都由㖊日轻微价外变成依家极度价内，几时收割都仲得。
后市会系点？大家一齐睇吓呢个图，系我特登揾我哋公司位好可爱慨designer Priscilla帮手画慨(我自己画埋慨话应该交唔切稿啦，呢位妹妹今年画慨利是封Design获得一致好评添)，50天线(蓝色；30607点)早己失守，之后大家都望住条100天线(绿色；29601点)，可惜今日裂口下挫时，顺便挫埋呢条线之余，就连由2016年2月12日低位18278点度至今年1月29日高位33484点，拉个黄金比率出嚟，其实系条100天线上少少位置就系0.236水平(29896点)，依家两个位都穿晒，不过唔紧要，下方仲有条0.382(27676点)同埋250天线(橙色；27184点)。“会唔会跌到咁低呀？”当呢个世界讲紧美股进入技术性调整范围嚟讲，港股插到边都真系好难讲，但可以肯定慨系去到呢个位日线图14RSI落到28，刚好踩入超卖范围；SlowSTC(14,3)进入严重超卖就梗架啦；讲咗几日慨MACD仲争条EMA(9)跌落负数区就正式发出“双熊”讯号；比较有“启发性”慨就系条DMI，启发到我即刻跑去Priscilla度叫佢帮我系个图度加返上去。
大家都知道DMI慨ADX系做咩架啦，唔知唔紧要，我唔会叫你上网Search咁贱慨，ADX就系反映大市慨力度，条线向上就代表个市力强，向下就代表力度弱，留意返呢度系唔涉及反映大市升定跌，只系力度啫。今日个图因为画两年恒指日线图，可能大家未必睇得咁清楚，如果你开日子短少少慨日线图睇，你就会见到条ADX虽然由1月29日高位缓缓向下，但依家走势似乎有兜底向上慨现象。假如，我只系话假如，港股要继续跟外围跌而ADX真系兜底向上慨话，都唔排除往后啲大题会变成：下望250天线(又系传说中慨牛熊分界线)。
开恒指牛熊证街货图睇，将图慨指数区域由过往睇开慨100改为200(如果用100慨话，咁即系图中显示10个牛熊证区夹埋先得1000点，即系全数死晒无嘢睇架)，依家10点54分，随住腾讯(00700)连400蚊都保唔住慨情况之下，恒指报紧29151点，跌1300点，so far大市食咗4325张期指，呢个数量同一餐团年饭有得fight，如是者大市依家踩住系29100至29299点，呢度有相当于346张期指，但按暂时最低位29129嚟睇，呢346期指当中有绝大部分已经死亡，再数落去慨都真系唔多货系度；都系慨，唔理买轮定买证，拣个位都好少一拣就拣到过千点咁夸张慨。恒指Put(18305)，行使价28600点，杠杆同引伸都只可以话适中，因为靓轮慨街货都已经over 50%，估唔到上个星期同人抢完暖风机之后，今日就要同人抢Put轮添；小注day Trade，因为今日系星期五。
今日特别鸣谢公司的designer Priscilla，啱啱放完假系上海返嚟就被我点佢去画图啦。
作者阿珊，从事财经及投资版报道超过10年，由平面媒体走到网络世界，《钟摆战策赢港股》作者。相信技术分析，由窝轮到牛熊证无一不炒，唔贪心，志在揾餐下午茶。
电邮：[email protected]
