【轮证赢家】收炉啦！
㖊日恒指早段系咁上，曾升逾700点，最高见过30169点，真系吓死人；可惜呢道气维持唔到，拆恒指5分钟图你就见到个市向下行，30000点得而复失，日线图上最终以“倒T星”慨样(个底系穿咗少少慨)收工。今朝恒开市又再上返30000点，但拆开恒指5分钟图嚟睇，暂时走势你会见到呈“圆顶”。
坦白讲年近岁晚，大市静局就必然架啦，不过传统上大家都会博一博新年第一击个市会开个红盘出嚟贺一贺佢，有图有真相，大家睇睇2009年己丑牛至上年丁酉鸡农历新年首个交易日第一吓慨开市表现、单日收市表现同全个农历年慨表现。(今年要等埋听日完咗半日市粒数先计到，但唔使计大家都知系升定跌啦，争在升几多啫。)
从上表中可以见到过去九年里面有六次系开红盘；而首日报升慨就有五次，以机会嚟计慨话就分别系66.7%同50%，所以话年头开红盘呢样嘢真系唔系百发百中，但当见到开市表现个机会率系多过一半慨时候，再加上年初五(2月20日)就己经有汇丰控股(00005)、恒生银行(00011)同埋中国平安(02318)出业绩嚟撑场，咁慨情况之下，首日开市开红盘应该难度唔高慨，可以拣定只恒指Call系听日吼恒指5分钟图上SlowSTC(14,3)见超卖时小注一入，坐过年博第一下开红盘时就即刻闪人；当然啦，若然听日开出嚟个恒指跌到妈都唔认得慨话，咁就算吧啦！
点解咁早讲定听日慨嘢？事关为咗可以同我老妈同舅父Eric去行吓花墟买花过年，所以返埋今日就收炉，系度预先祝各位新年进步！三财入库！狗年行大运！
又适逢今日情人节，小妹喺度祝大家甜甜蜜蜜！开开心心！日日都系情人节咁Sweet！
《轮证赢家》初五启市！(放假mode启动！)
作者阿珊，从事财经及投资版报道超过10年，由平面媒体走到网络世界，《钟摆战策赢港股》作者。相信技术分析，由窝轮到牛熊证无一不炒，唔贪心，志在揾餐下午茶。
电邮：[email protected]
放大图片
