【轮证赢家】A中Call博明日A股开红盘
一早返到公司，凳都未坐暖就有个妹妹走嚟大笑“哇哈哈”，望望先知原来系㖊日无返慨同事Running，未过年之前佢指定咗要某间财经网站出慨利是封(大学同学Milk寄比我慨)，因为佢话嗰只利是封好闻㖞，well，我都系第一次被人要求要用指定慨利是封入利是。
虽则新一年就新开始，不过㖊日恒指CHOK到飞起，全日高低波幅都有成600点，最终收市始终见红；低位30720点穿过条50天线，就算今日恒指做返好，但见10天线(30369点)同100天线(29753点)愈来愈近，都唔知会唔会整多个“死亡交叉”出嚟。
依家10点12分，恒指做紧31075点，升202点，开恒指牛熊证街货图，下方最贴价牛证30400至30499点同埋30300至30399点绝对系最吸睛，事关呢两个范围分别有792同883张期指，唔单只系牛证区最重街货，仲系成个表之中最多货慨两个地方，但同现价比较慨话一睇都知争得几远，由现价起步下行多675点先可以食到第一批重货；若然落多100点慨话咪就系第二批啰。
但如果个市上行又点呢？无嘢慨，少啲肉食咁解啫，不过最近个位系31300至31399点，只要现价升多229点就可以食晒呢个范围慨货，只系呢度得127期指，唔知够边个食啫；望望月历，原来久休慨A股明日开市。
系呀，你啱呀，正所谓：桥唔怕旧，最紧要受！(你够年年买花比女朋友/太太做情人节礼物啰！好有新意咩？)上上大陆报价website，揾条上证综指睇，上个星期三(2月14日)收报3199点，日线图见上证最后粒烛爬返上条5日线(3186点)之上，同时由于前三四日粒烛系完完全全跌出咗保历加通底部，依家终于都叫做回复正轨；重点系内地股市开市开红盘慨重要性，比港股开红盘还要大嘛，A中Call(20735)，行使价16.38元，2%轻微价外，小注一试无妨呀！
作者阿珊，从事财经及投资版报道超过10年，由平面媒体走到网络世界，《钟摆战策赢港股》作者。相信技术分析，由窝轮到牛熊证无一不炒，唔贪心，志在揾餐下午茶。
电邮：[email protected]
