【轮证赢家】采短线钟摆策略
上个星期五(2月23日)捉只贴价、中期Call轮，博一下子由价外变价内慨爆炸力，将轮价炸上去。经过周末同屋企人打完牌，再加埋睇完个冬奥闭幕礼(喺电视睇啫，零下三度㖞…你估我仲后生咩！)慨洗礼之后，差啲将呢件忘记得一干二净，好彩依家每朝早几乎都有电视台慨同事send个message比我，话我知恒指开乜(其实叫我send push notification之嘛)，先至唤醒番我三日前做过啲乜。
今朝恒指开升261点，报31528点；返到公司时见到恒指升幅收窄到得返44点，做紧31311点，条20天线(31338点)我今朝出push时仲话佢收复咗添架，依家一个唔该又跌返穿，且同50天线(30947点)愈来愈近。虽则恒指呢期唔系话升得好劲，但咁样慢慢弹吓弹吓，都弹返上2月7日个裂口31712至31472点里面，无错，裂口系用嚟补慨，不过会唔会弹一下补完之后又好似依家咁高开低走，就真系无人知啦。
依家10点22分，同完老妈whatsapp吹水后，恒指点数上仍然无咩大变动，以暂时最高做过慨31567点放落恒指牛熊证街货图上计，即系话恒指今朝系踩入过31500至31599点，呢度有相当于776张期指，属于熊证重货区；拆细啲用50点为一个范围单位睇，原来31500至31549点呢度有716张期指，计及最贴价慨31300至313994同31400至31499点呢两个已被食慨熊证计算，今朝大市total食咗825张期指。望望月历，今日26号，听日就系期结，就算今个月大户凑够期指张数，最多都只会企系度等下个月慨开始；若然系唔够数慨话，断估都唔会贸贸然向下冲落山坡、再过多两个山头同埋十条村，走去食牛证咁远征挂。继续用贴价Call先啦，恒指Call(16964)，行使价32158点，2%轻微价外，以恒指5分钟图SlowSTC(14,3)见超卖就入，超买就出，作短线钟摆策略。
作者阿珊，从事财经及投资版报道超过10年，由平面媒体走到网络世界，《钟摆战策赢港股》作者。相信技术分析，由窝轮到牛熊证无一不炒，唔贪心，志在揾餐下午茶。
电邮：[email protected]
