【盘房来料】汽车医药教育股逢回吐吸纳
上周五美国10年债息有所回落，带动美股大幅反弹，港股喺夜期跟ADR已重上31400点水平，成功收复20日线(31345)。今早恒指高开261点，早段高见31567点，其后再度考验20日线，曾低见31274点，其后喺20日线水平站稳脚，大市重拾升势，半日升191点，报收31459点；国指则升86点。
重磅股以港交所(00388)最强劲，上市制度改革，为抢占全球IPO作好准备，唔少大行都唱好，刺激其股价喺明日业绩公布前急升，半日报收294.8元，升3%。明日派成绩表前又偷步落镬，令阿Man担心佢有样学样，好似大笨象(00005)一派完成绩表见光死，如果未有货喺手，呢啲价唔建议高追，宁愿等埋业绩睇吓乜嘢环境再决定。至于有货喺手，当然继续持有，留意300元阻力唔细，升唔穿300元，出完业绩先食糊亦冇坏。
除咗港交所，其他几只重磅股，今日都系高开后乏力再上，唔少中午收市价计仲要出埋阴烛，难免令人觉得个市乏力再向上。腾讯(00700)逆市跌少少，仲有三个星期先派成绩表，暂时先作整固，冇乜必要咁快炒上去破顶。至于平保(02318)同样仲有几个星期先公布业绩，不过港交所交改革上市制度，有助平保旗下业务加快分拆上市步伐，全城期待慨陆金所同埋平安好医生，如无意外上半年可分拆上市，平安好医生更已完成一轮Pre IPO，唔少大孖沙已入股，平保目前于87元之前横行，要博业绩同分拆，85元至87元之间可收集。
吉利(00175)母公司入股平治汽车母企戴姆勒近一成股权，成为其最大股东，内地汽车业有意问鼎全球汽车业一哥宝座之心昭然若揭，市场对入股消息反应正面，认为吉利透过入股换取技术，对其日后发展有利。吉利半日股价升逾8%，成为最佳表现蓝筹股。而长汽(02333)亦跟宝马签意向书，共同发展新能源汽车，大行亦睇好，半日股价升6%。阿Man早于去年底已表示，今年仍睇好汽车板块，虽然全年升幅未必及旧年咁劲，但整体业绩今亦唔会失礼。
至于阿Man一直睇好慨医药股，今日亦落镬，两只已推介过慨龙头股石药(01093)同中生制药(01177)，分别升2.7%及3.8%，前者下周正式晋身国指成份股，后者则成为“港股通”新经济股。虽然教育股今日表现 一般，但呢个板块阿Man今年亦睇好，不妨趁回吐收集，教育股随住需求增加，今年仍可睇高一线。
大市喺明日期指结算前，应唔会有太大突破，但目前正以一个底部高于一个底部慨形态向上推进，但要大市重拾升轨，除咗要企稳20日线之外，定必要回补大型下跌裂口31600-31700点，否则表现仍然反复，可能又喺一千点内上上落落。
麦狄文
(徐狄怡‧证监会持牌人)
