【轮证赢家】冷吼银娱Call博靓绩
㖊日朝早见个市弹完开市嗰一下之后就回塘，写紧只稿嗰时恒指做咗全日低位31273点出嚟，恒指5分钟图SlowSTC(14,3)当然见超卖啦，只可惜未能捉得到呢一下入只call轮等钟摆反弹，因为我仲未交稿啰；唔紧要，去到下半场1点20分到，恒指当时做紧31300至31400点咁上下，嗰时稿又交晒，饭又食饱，早早拣定慨恒指Call(16964)可以落场作钟摆操作。其后系2点15分到，恒指5分钟图SlowSTC(14,3)由超卖弹反上超买，不过当时见(16964)升到0.242元，对比1点20分买入时慨0.238元，只系升得4格/1.7%，若然本大慨计落都可以赚到粒下午茶慨；但若然本细慨，就反正本细落，过一过夜慨话，今朝见恒指开市升292点时，(16964)仲唔掉走佢等几时㖞；记住，轮系唔可以同佢坐艇斗长命架。
睇返恒指日线图，依家10点10分，恒指高低位分别系31798点同31632点，暂时同㖊日都有个裂口存在；但对比起2月7日个裂口嚟计，严格嚟讲都叫做补咗慨。㖊日收市恒指上返条20天线之上，今日粒烛就更加完全企入保历加上升通道，虽则依家恒指升幅有所收窄，且今日条20天线(31273点)又似继续下行跌穿条50天线(31008点)，但留意番，下底条10天线(30863点)努力抽升中。平均线嚟讲最理想就更系同六合彩啲彩色号码球一样，由上至下、细至大(天线无分左右)顺序咁排列，好似今年1月恒指日线图咁，由排最高慨10天线，一直向下顺序排20、50、100同250天线。Anyway，依家唔系顺序排唔紧要，但若然三线汇聚慨话，咁汇聚嗰一个point都应该会被视为颇有力度慨支持。
业绩期开始咗，当对住市无咩谂法慨时候就会变成“炒股唔炒市”，今日友邦(01299)晨早就公布咗截至11月底止17/18年度全年业绩，由于业绩好过预期，所以今朝早出咗粒阳烛裂口高开，仲弹穿埋条50天线(64.82元)添。明日就港交所(00388)业绩，盖上年个市火红火绿、全民皆股，推到成交额过千亿是等闲事，摆到明好生意啦，不过港交所股价其实都升咗唔少，今日无情白事出咗粒阴烛添。
听日出业绩慨仲有银娱(00027)。濠赌业的确系经历过低潮期慨，但根据澳门博彩监察协调局慨数字，去年每月幸运博彩毛收入按月计个个月都系见升，平均每个月升19.2%，都反映到濠赌业走过低潮。
再睇银娱日线图，银娱刚好完成咗个“V”型反弹，依家上到颈线(约70.7元)水平，SlowSTC(14,3)%K线同%D线分别报82.96同71.78，系超买但呢啲敏感度高慨技术指标，见8或9字头亦是等闲事，而且银娱条10天线(66.74元)准备升穿20天线(66.89元)，“短期黄金交叉”出现之余仲将五条主要平均线顺序排番好，若然交份靓仔业绩出嚟慨话，先爆个“短期黄金交叉”出嚟，再升穿埋条颈线，哗！银河牛(57025)，收回价 65.18元，同现价有逾6%距离，小注落场；点解唔拣Call？你自己Search吓啦，成交又无街货又多，点拣啫。
作者阿珊，从事财经及投资版报道超过10年，由平面媒体走到网络世界，《钟摆战策赢港股》作者。相信技术分析，由窝轮到牛熊证无一不炒，唔贪心，志在揾餐下午茶。
电邮：[email protected]
