【轮证赢家】一堆肥牛等跌市
㖊日挂住打完只稿就搞《财政预算案》，结果就甩辘，交稿时连条题都唔记得改，好彩杜比提返我，证明我个人一有嘢要赶慨时候就真系会有甩漏。唔该杜比。
话就话要做《财政预算案》啫，但其实㖊日都有唔少大嘢出业绩，港交所(00388)够大啦挂，仲有信和置业(00083)同希慎兴业(00014)，当然唔少得慨就系早两日喺《冷吼银娱Call博靓绩》睇中慨银河娱乐(00027)啦，仲拣定咗银河牛(57025)添。不过㖊日见住财爷陈茂波一路宣读佢份《财政预算案》，个市就一路系咁跌，跌足一个朝早，银娱又点会幸免呀，真系求命，嗰刹那几想财爷快啲读完，一来佢读完就等于可以放饭，二来个市可能会停止再跌呢。又真系㖞，呢个世界有时邪到你唔信，再加埋银娱本身份业绩优于预期，下半场一开市银娱逆市做好仲倒升，(57025)简直执身彩，去到下昼1点25分，虽然唔系银娱Day High位，但见到5分钟图SlowSTC(14,3)由超卖上返去超买就知要收手啦，(57025)当时做紧0.057元附近；若然阁下真系咁准等银娱上到Day High先嚟走慨话，(57025)都系做到0.063至0.065元呢啲位，同买入个位打成平手，但都叫做输手续费，算！“山大斩埋有柴”咪得啰！
睇返恒指今日走势，都系喺早两日嗰条《冷吼银娱Call博靓绩》稿度写咗恒指10、20天50天线(31055点、31055点同31064点)有机会出现“三线汇聚”，如是者呢个汇聚点“应该会被视为颇有力度慨支持”；但见今日恒指低开300几点之后，依家9点59分，恒指跌幅虽然有所收窄，但好不幸地今日粒烛完完全全处于呢个汇聚点(就当住系31055点先啦)之下，原先慨颇有力度慨支持，都恐怕会变成颇有力度慨阻力。
依家10点18分，恒指报30651点，暂时最低做过30453点。开恒指牛熊证街货图，恒指今日个低位已经杀到入30400至30499点呢个位，呢度亦即系牛证慨重货区，有相当于1573张期指；而30700至30799点，落至30500至30599点呢三个100点范围就当然渣都无得剩啦，夹埋有945张期指。
30400至30499点呢个重货兼最贴价慨牛证区就未死得晒慨，而第二贴价30300至30399点，呢度都有成1140张期指。对比起楼上最贴价熊证系31000至31099点嚟讲，30300至30399点慨熊仔都系凶多吉少，恒指熊(57238)，收回价31338点，同现价有逾600点距离，例牌吼恒指5分钟图见超卖先好落场。
至于㖊日都有提过慨汇丰控股(00005)，今日就当然随市下跌啦，日线图上慨SlowSTC(14,3)%K线(4.817)同%D线(11.93)都跌到接近跌无可跌慨地步，不过14RSI仲见33.9，都有几会等个市再跌多下之后汇控先至借技术反弹爬返起身，但今日见汇控啲牛证街货多到呢…真系好受老散慨欢迎同爱戴，暂时拣定只汇丰牛(62790)，收回价76.18元，暂时都仲系眼看手勿动，除非下半场唔知做乜大插啦，咁就可以博大雾小注落场。
作者阿珊，从事财经及投资版报道超过10年，由平面媒体走到网络世界，《钟摆战策赢港股》作者。相信技术分析，由窝轮到牛熊证无一不炒，唔贪心，志在揾餐下午茶。
电邮：[email protected]
