【轮证赢家】今日入熊勿过夜
㖊日恒指Chok到隔夜饭都呕埋出嚟，高低波幅有成600点，因应㖊日个恒指牛熊证街货图嚟预测恒指有机会向下冲杀30400至30499点同埋30300至30399点呢两个最贴价又重货慨范围，如是者拣定只恒指熊(57238)，坐定定等恒指5分钟图见超买落场。系朝早11点至中午收市，同埋由下昼2点45分至全日收市前呢两段时间，恒指5分钟图慨SlowSTC(14,3)都Keep住系超买水平，(57238)当然可以落场啦，问题系见住个市Chok到咁，都真系吓到鼻哥窿都无肉。
都话过唔理你系老散定专家，落场慨心理质素都系重要同埋要自我“训练”慨一环，呢样嘢早两日我喺公司等升降机时，见到我老细慨老细时，佢自己都系咁讲。今朝起身开电视见到右下角报日经粒数系负300几点，心谂：发生咩事？训个觉啫，搞成咁慨？然后新闻报道员就话我知：“特朗普宣布下周对入口铝钢征重关税，市场忧虑爆发贸易战，拖低三大美股表现…”明晒，(57238)今日应该可以报仇。按嗰两个入市时段嚟睇，(57238)当时大约做0.035至0.07呢个Range里面，依家10点7分，(57238)似乎愈升愈有，暂时睇最低做过0.074元，最高见0.091元。就算你一开市就掉走(57238)，都未至于要你输入肉；假设你依家先施施然去处理只(57238)，都仲有最少10零格水位比你慢慢食。
返番去睇日线图，㖊日讲过恒指日线图上见三线汇聚，而咁啱粒烛就处于汇聚点(31068至31082附近)慨下方，唔难想像呢个位慨阻力有几强。今日一插，咩技术指标都即刻发出看淡号讯；不过咁，由于㖊日失心疯咁弹咗上去之后今日再插500几点，系牛熊证街货图上其实无嘢落过肚。
㖊日恒指最低做过30453点，今日(至10点14分止)最低位就30477点，换言之其实恒指今日跌500几点，对于恒指牛熊证街货嚟讲，佢都只系用佢慨低位踏番入去牛证最贴价区30400至30499点里面。拆细啲用每个范围50点慨牛熊证街货图度睇，其实恒指只系杀咗30450至30499点慨牛证(我知以㖊日低位计30453点系仲争3点先叫做完全死亡，3点就豪比佢啦)，呢度有相当于942张期指，再向下数到落30300至30349点呢三个50点慨范围的话，其实每个都有成300几张期指；上方熊证最近都讲紧系31050至31099点，即系个汇聚点附近位置，亦即系率先升穿条20天线(30955点)，你要个市今日反弹跳返上去呢个位有无可能？恒指熊(57251)，收回价31200点，高过汇聚点水平，留意番，若然依家先嚟入熊慨话，你都系做day trade算啦，反正因消息而下跌慨市过一两日就会复原；再者今日星期五，过夜慨话讲紧一过就过Weekend，如果Weekend美国征税单嘢有咩新进展，你真系无仇报…
祝各位元宵快乐！今日收工返屋企同家人团圆一吓啦！
作者阿珊，从事财经及投资版报道超过10年，由平面媒体走到网络世界，《钟摆战策赢港股》作者。相信技术分析，由窝轮到牛熊证无一不炒，唔贪心，志在揾餐下午茶。
电邮：[email protected]
