【轮证赢家】留心30000点水平
上个星期五(3月2日)恒指裂口低开之后就一直横行，差啲仲以为已经收咗市定个Network有事；拆开恒指5分钟图睇慨话，SlowSTC(14,3)系下昼1点50分时出现超买，恒指熊(57251)终于等到落场慨机会，不过呢个位度落去又系开市个口价附近水平，兼且头顶有条250分钟线顶住，呢啲咁慨阻力位又刚好好分钟图遇到超买，哼，都真系咪驶旨意破得到(I mean短期内)；同日下昼2点25分，恒指5分钟图SlowSTC(14,3)火速由超买变超卖，(57251)按买入同卖出价嚟计，其实都有六至七格落袋，问题系你个注慨六至七格你够唔够食啫。
依家10点11分，恒指暂时最低做过30225点，开恒指牛熊证街货图睇，最贴价嗰两Part牛熊证(30400至30499点同30300至30399点)呢两堆牛证全数死亡；呢句都未打完，10点12分恒指再做出一个新慨day low(都系暂时计)30178点，根本就系死亡直播咗30200至30299点慨牛证。呢三堆牛证埋夹有相当于2649张期指，今日个市下半场可能同上个星期五一样横行就算，事关买跌慨一早收晒工，买升慨见到咁慨情况仲唔仆去鹅颈桥打小人咩，你望吓月历，今日惊蛰呀！
返番去睇恒指日线图，上个星期讲到依家慨三线汇聚喺上星期四(1日)形成个点，当日支大阳烛破唔到，其后就出现两支阴烛(计埋今日)，下方第一个支持位应该就系100天线(29999点)，呢个位又刚好系啲大关口(30000点)附近水平，若然呢个30000点天守慨话，咁继续下行慨压力就变得更大。再者，你睇埋条14RSI同SlowSTC(14,3) ，根本仲有位落。先预期30000点有支持先慨，你肯博慨就恒指熊(57385)，收回价31150点，同现价有约逾800点差距，28倍杠杆够做day trade或小注过夜架啦(咁你肯博就系拣只杠杆高啲架啦)；如果你今朝已经收割咗，谂住睇吓个市落到30000点时会反弹定二话不说咁穿落去，咁你下昼真系可以去鹅颈桥打小人，事关so far你都系等个市落之嘛，惊蛰一年一次慨，唔打都睇吓呀！
作者阿珊，从事财经及投资版报道超过10年，由平面媒体走到网络世界，《钟摆战策赢港股》作者。相信技术分析，由窝轮到牛熊证无一不炒，唔贪心，志在揾餐下午茶。
电邮：[email protected]
