【轮证赢家】好友:保祐恒指守住50天线
上个星期五(3月9日)见恒指咁巴闭咁升穿咗个“三角形”不得止，就连条10天线都穿埋，于是就执咗只恒指牛(57727)，等到下半场恒指其实都只系朝早裂口爆升嗰一下有啲睇头之外，基本上大部分时间都系横行；不过拆开5分钟图睇SlowSTC(14,3)，都仲可以分到超买同超卖慨，喺下昼2点40分至3点25分呢段时间，SlowSTC(14,3)%K线跌穿%D线之余，两线齐齐下行，3点25分呢个位虽然唔见得严重超卖，但再过多5分钟，见SlowSTC(14,3)始有回升慨迹象，(57727)就随即落场。尾市落场摆明小注过夜，如果唔系今朝又点可以食到个裂口高开慨540点呢。
依家9点57分，公司静到我谂鬼行过都听到，无计啦，㖊日补选做死班港闻同事，今日晏少少返都好合理呀！而呢个时候恒指系日线图上呈高开低收，而此前见20天线(30692点)向下杀落条100天线(30108点)，依家条20天线拗腰炒返上去，下方啲技术指标都系一样，由原先看淡/超卖回升返变中轴水平。
依家10点4分，恒指做紧31365点，最高暂见过31536点，开恒指牛熊证街图货睇，恒指今朝个裂口一弹就食咗最贴价嗰五堆熊证街货由31000至31099点开始向上数五个100点范围，到31400至31499点都已经死晒，呢度夹埋有3042张期指，呢个场面热闹过㖊日系万宁买牙膏送公仔面、米、豆奶、牙刷同XO酱，仲有Coupon送，坚系见唔到龙尾咁滞。
按恒指暂时做慨高位31536点计，先系31500至31599点呢度已经变成最贴价，其次呢个最贴价慨围里面有部分熊证其实都系死咗慨，依家睇31600至31699点同31700至31799点呢两part街货唔多，分别得93同40张期指，但目前见恒指个高开低收慨样，或者会引到部分慨钱调转枪头买跌，然后入贴熊慨。如果你打算咁做慨话你就要小心啲，事关下方最贴价慨牛证讲紧系30800至30899点，同现价有逾500点差距，除非恒指用今日余下慨时间继续高开低收，收到所以升市点数全数蒸发啦，咁就有偈倾啦。
依家10点19分，恒指裂口高开回少少之后似乎都系想横行到收市咁滞，如果尾市恒指仲守得住条50天线(31256点)慨话，恒指牛(57863)，收回价30700点，同现价有逾600点差距，逾约41倍杠杆，够有凸啦！
作者阿珊，从事财经及投资版报道超过10年，由平面媒体走到网络世界，《钟摆战策赢港股》作者。相信技术分析，由窝轮到牛熊证无一不炒，唔贪心，志在揾餐下午茶。
电邮：[email protected]
