【盘房来料】收复50日线反复向上
上周四《盘房来料》标题‘大市快突破向上已露端倪’，虽然周五呼吁大家少理指数幅，尽量喺板块宝觅食，可惜仍有淡有未领悟当中道理，一味买熊养熊过周末，未有理会大亦成功喺10日线同20日线暂稳脚后，定必向上挑战50日线。结果周五被挟住过埋周末，周五晚美股做好，纳指更创收市新高，港股今早一开市，31500以下慨熊证街货全数阵亡，除咗向淡友讲声RIP，阿Man已经唔知讲乜好。
恒指裂口高开540点，报31536点为半日高位，成功收复50天线(约31257点)，但又裂口高开，兼尽杀31500下面慨熊仔，短线再大幅抽高挟上诱因未揾到，升幅收窄亦好正常。恒指升幅曾收窄至346点，见31342点半日低位。恒指中午收报31469点，升472点；国企指数中午收报12660点，升228点。
咪睇少中银监下调拨备红线慨威力，中银监此举，即曲线提醒各内银放胆拨备，意味住2017年份成绩表够晒水位做嘢，反映内银股旧年份成绩表肯定见得人，呢个背后讯息阿Man收得到，唔知其他缸边友收唔收到。今日内银股叫做主力撑住大市上，当中建行(00939)升3%，跑赢其他内银股，其他内银升幅亦过1.5%，成个板块精神爽利。至于内险股亦转咗势，当中阿Man至爱平保(02318)，仲差些少可升穿87.5元，突破之前横行区，要突破横行区，先有本事重上90元楼上。
重磅股四大天王，又系大笨象(00005)最落后，不过呢啲位慨大笨象，似乎系食之无味，弃之可惜。几时都系腾讯(00700)跟港交所(00388)行得快啲，呢期阿Man都系睇住腾讯，下周公布业绩，派成绩表前要揾位低吸。至于吉利(00175)入股平治母公司戴姆勒得到阿爷祝福，从此平步青云，既然系业界龙头，更有意成为世界五大汽车制造企业之一，逢回吐要买入股份名单上又点少得佢。银娱(00027)重上70元，话咗系濠赌股首选，几乎都无乜机会买低位，一见大阴烛出唔系跳车，反而系揾位捞货。药业股继续强劲，跟教育股轮流落镬，即炒梗系高沽低买，今日短炒慨话，系揾医药股食糊，而教育股则低吸。
至于大市自30200点企稳后扶摇直上，唔觉唔觉升逾千点，最近两次上升又遗下上升裂口30700跟今日慨31000点，大市要再向上挑战31800回复强势再闯新高，话唔定要先回补呢两个上升裂口。虽然大市系向上，但反复向上慨机会，大过坐直升机急上，尤其31800点未收复，仍未有条件再创新高。
麦狄文
(徐狄怡‧证监会持牌人)
