【轮证赢家】恒指牛续做追“升”族
我承认我绝对系一个文盲，㖊日好彩有读者email比我话我知我㖊日只稿推介慨牛证打错code，等我可以同返《信报》编辑讲返改番，真系抱歉，但都感谢你哋特登email过嚟提点。
㖊日执定只恒指牛(57863)(今次个code无错架啦)出嚟，打算等尾市时段见超卖时入场；但等到收市咁滞都系揾唔到个靓位，你拆开恒指5分钟图你就会见到㖊日恒指裂口高开之后就一直横行至全日收市，而敏感度最高的SlowSTC(14,3)，尾市都唔见有边个位出现明显慨超卖，成件事其实系收咗档架。不过，今朝未打稿之前就收到读者话㖊日一早已经买咗恒指牛，但见㖊晚美股脚仔软，搞到今朝恒指先跌24点开市后，之后就向下冲，依家10点15分，最低暂时见过31461点，跌133点，但已经收复失地之余，恒指so far倒升31612点，升18点。拆开恒指5分钟图睇，就当读者系㖊日下昼1点5分或1点25分，恒指SlowSTC(14,3)见超卖时入(57863)，之后揸到今朝见恒指低开高走慨时候收手，呢一来一回其实都有十零格食到；再者依家恒指都仲倒升紧，若然本身系大注慨话，都怕且已经收咗队，上网揾紧今日lunch去边度食好嘢啦！
若然㖊日无入到牛证咁点好呢？转返恒指日线图睇，今日粒烛仍然企咗系50天线(31294点)楼上，上升形态仍然未变；转用保历加通道睇，上星期四(3月8日)恒指其实重返20天线楼上，换言之亦即系重返保历加上升通道里面，到依家都仲一顶穿条保历加通道顶(31990点)，而成条保历加通道形态亦都呈上，即系话恒指其实仲有再上升慨空间。
开恒指牛熊证街货图睇，依家10点28分，恒指做紧31600点，暂时最高做过31709点，即系话31600至31699点嗰213张期指已经全数死亡，最贴价慨系31700至31799点，呢度有165张期指。至于最贴价就系第三贴价区，即系31900至31999点，呢度有相当于751张期指。用呢粒数嚟度慨话，即系话假设恒指今日要一下子爆200几点上行食到呢个重货区，讲紧都只系升穿保历加通道顶9点咁大把，大市升穿保历加通道顶大家又唔系未见过，只系穿得两三日就会被条保历加通道包返住咁解之嘛。
至于下方牛证最贴价慨系30800至30899点，呢度有相当于359张期指，如果现价向下行800点慨话，就可以食到呢度第一批货啦，比多100点，即下行900点，仲可以食到30700至30799点嗰743张重货期指添，但成件事你话会唔会远咗少少？
哈哈，市场上最贴价嗰四只恒指牛啲街货多到呢…(57854)仲100%街货，几受欢迎，唯有拣远少少啦，恒指牛(57839)，收回价30650点，同现价价有逾900点差距，杠杆约32倍，成交活跃，见恒指5分钟图超卖先好入市，小注为上。
作者阿珊，从事财经及投资版报道超过10年，由平面媒体走到网络世界，《钟摆战策赢港股》作者。相信技术分析，由窝轮到牛熊证无一不炒，唔贪心，志在揾餐下午茶。
电邮：[email protected]
