【盘房来料】大市反弹力弱暂宜观望
隔晚美股反弹，几只科技龙头股俾人遭质完一轮，隔晚终于还击大反弹，带动美股三大指数回升超过1%，港股喺夜期同ADR时段都大覆反弹。可惜又换来另一次慨高开低走，再度下试三万大关。
恒指今早高开293点，一度升328点，见30336点半日高，可惜10天线(30304点)跟20天线(30310点)都系守唔住，急急脚又掉头向下，升幅几乎完全蒸发得番11点，低见30019点，目前险守三万关，中午报30031点，升24点；国企指数则报11942点，跌6点。平安好医生(01833)完成招股，港汇又再度逼近弱方兑换保证，好医生之前冻结慨资金，好快释放可能另一轮走资潮随时展开，将再度影响股市投资气氛，令港股再度走弱，呢个亦系近日港股每每高开低走慨原因。
睇番大部分慨重磅股，唔觉唔觉已去返二月低位，甚至失守当时低位，二月低位恒指大约喺29200点水平，但目前恒指仍然喺三万点水平，大市乜嘢环境，大家真系要谂谂。重磅股今日普遍反弹，可惜大部分高开低走，好似腾讯(00700)开市390元，但半日报收384.2元，反弹升幅大大收窄，走势每况愈下。至于一对苹果孖宝仲惨情，瑞声(02018)开市略弹即再倒跌，舜宇(02382)则高开低走，反弹升幅冇咁一大截。其他重磅股亦咁上下，阿Man担心当下半场期指结算价敲定后，重磅股表现每况愈下，恒指三万关可能失守。
只有石油股继续有买盘追捧，中石化(00386)首季盈利增12.85%，股价升3.1%；中海油(00883)升2.5%；即将公布季绩的中石油(00857)升1.8%。暂时已派季度业绩慨磅股，无论放榜成绩好与坏，股价都系偏弱，就连平保(02318)出动埋特别股息0.2元人仔，亦未能留住好息之徒。大行对平保睇法唔多一致，当中有大行认为其业绩表现不俗，但亦有大行降其目标价，拖累平保股价创今年新低75元，半日股价跌3.8%，报收75.55元。
之前强势慨内需股，食品及饮品股今日显著受压，唔少粉丝问现价可否捞底，讲真跌势似乎刚刚开始，无谓咁早出嚟接飞刀，暂时都系眼看手勿动，医药同教育股情况亦类同。暂时指数仍守三万，但阿Man愈发觉唔多对路，除咗唔少重磅股已跌守二月低位，就连强势板块亦有神无气，除咗同周末前夕有关，亦有机会系缸边友怕咗五穷六绝呢个魔咒。
虽然港股现价已逼近呢期动移动区间底部，即29800水平，但反弹浪低于一浪，睇嚟移动区间有机会下试，今日周末前夕未宜多手。今日系happy Friday，而非happy fly day，㖊日29800水平博反弹，今早唔即见好就收，今日再见29800水平都好，买包花生食吓算数……
麦狄文
(徐狄怡‧证监会持牌人)
