【盘房来料】大笨象季绩强差人意
曾经有唔少人问我，点解喺各个平台发表慨专栏，九成九都系以口语化写作，我可以好清楚肯定咁答大家，因为我母语系广东话，我自细学写慨系正体字，喺香港地大部分人一直以广东话沟通，要最直接表达我慨想法，最理想当然系用广东话…..完。
讲番隔晚美股又坐过山车，早段市场担心美方贸易谈判代表出访中国无功而回，道指一度插水近400点，最终收市倒升5点，可惜仍未能收复二万四大关，至于标指跟纳指跌幅收窄。美股能够拗腰，全靠白宫经济顾问派定心丸，指双方谈判进度理想，目前只等中方回应配合。留意番……系要中方配合，阿爷肯唔肯就范系一件事，千祈咪太一厢情愿。估计呢两日美股都会受谈判消息影响，不过有著名策略师就话美股低位大反弹，主要系因为价钱太平，吸引资金入场扫货。
讲到平，港股现价PE仲平过美股多多声，不过阿Man唔系著名策略师，当然无缸边友会听我呢枝笛。睇番港股呢边，感觉上系摇摇欲坠，恒指今早高开3点，报30316点，系咁矣见一见30341半日高位后反复回落，一度跌327点，见29985点半日低位，其后跌幅收窄，三万大关失而复得，恒指中午报30208点，跌104点；国企指数报11984点，跌34点。恒指继续喺29800点至31000点之间上落，直至今日亦未走出呢个框框。
腾讯空军似乎开始收手
重磅股四大天王只有腾讯(00700)逆市上升，皆因空军似乎开始收手，呢两日腾讯累积沽空金额有回落迹象。相反平保(02318)累积沽空金额有增无减，截至㖊日累计沽空金额已达1130亿，可见空军大户对平保睇法要几淡有几淡。又好难空军对平保开火重击，今日阿仔平安好医生(01833)首日登陆鱼缸，股价最高58.7元，半日报收55.55元，抽中一手高位出货都叫有杯咖啡饮吓，以上半场收市价计，手续费都蚀埋畀佢，唔怪得有缸边友即帮好医生改名，叫做平安西医，以咁大晒士慨新股同埋近日上市主板股比较，好医生表现又真系西咗啲。未能母凭子贵，平保半日跌0.7%，险守75元，报收75.1元，下个支持位喺250线，即系69.3元。
回购规模逊预期
另一市场焦点当然系大笨象(00005)公布季度业绩，结果系表现强差人意，季列账基准税前盈利跌4%，短期内展开最多20亿美元回购。大笨象虽然卒之公布回购计划，但晒士得嗰20亿美元，兼且讲到明系年内唯一一次回购，股价表现当然唔会好得去边。加上未能守住78元，又要睇番75元呢个位守唔守得住。
几只重磅股表现麻麻，目前系最弱势慨腾讯叫做定番啲，但另外三头马车又死死地火，恒指能够守住30000大关已经要收货。即管睇吓中美贸易谈判发展如何，将会直接左右中、港、美三地股市表现。
麦狄文
(徐狄怡‧证监会持牌人)
