【轮证赢家】恒指长方形再变下降通道
上个星期五(5月4日)见住恒指系咁落，10天线再次成为阻力位，虽然只系拣咗只恒指Put(11688)出嚟，无熊证啲杠杆咁吸引，不过够食就已经可以，做人千祈唔好贪心。暗自欢喜6点收工返屋企，等升降机时就走去开一开信箱，一打开几乎将所有识慨粗口都爆晒出嚟，事关我收到成个宇宙最黑人憎嗰封信：报税表！唉，要嚟慨始终都要嚟，不过今年好少少，因为我终于都可以填我老爸个名落去啦！
为咗要准备交税，呢期都要努力啲。依家9点59分，恒指做紧29886点，最低见过29791点，开埋恒指牛熊证街货图再睇，29800至29899点慨牛证全数死亡，呢度系最贴价亦都系牛证最重货区，有相当于1941张期指。依家牛证最贴价慨变相系29700至29799点，呢度有1537张期指。至于上方熊证最贴价慨系30300至30399点，呢度有155张期指，真系一啲都唔算多，就算依家10点7分，恒指跌转升53点，做29980点，但都要由现价上行320点先至可以踩到最贴价熊证慨门口，若然用同样慨点数向下行慨话，咁熊证嗰1537张期指都可以食埋，如是者又有咩诱引要个市上行呢？
再睇返恒指日线图上慨走势，上个星期先话恒指由此前慨“三角形”变咗做“长方形”，今日再睇由于恒指近期慨低位似有愈嚟愈低慨迹象，换言之呢个“长方形”开始打斜行，一个打斜行向方向又系向下慨“长方形”咪即系“下降通道”啰，咁啱今日个低位又踩到“下降通道”个底。
综合恒指牛熊证街货图同恒指日线图慨话，恒指向下行慨机会较高，不过由于今朝由已经狠狠插咗一下，所以再狠狠地插多吓慨机会似乎唔会今日再出现，就算我哋入Put或者熊证都要等一等先。恒指熊(66945)，收回价30800点，同现价有逾700点差距， 拣定出嚟等到恒指再弹高啲，甚至弹到“下降通道”顶先好入；若然你好进取或者要交好多税慨话，咁你可以非常快手地Call/买恒指牛，就博佢呢吓弹，day trade慨话而你又有时间慨，杠杆高少少都唔怕，可以吼恒指5分钟图见超卖落场。
作者阿珊，从事财经及投资版报道超过10年，由平面媒体走到网络世界，《钟摆战策赢港股》作者。相信技术分析，由窝轮到牛熊证无一不炒，唔贪心，志在揾餐下午茶。
电邮：[email protected]；微博：Gladyshan
