【轮证赢家】恒指处“下降通道”中间
㖊日拣定只恒指熊(66945)出嚟，谂住等恒指5分钟图见超买时落场，谁不知一等就等到下昼3点半先见到条SlowSTC(14,3)出现超买，哗！呢啲钟数落场摆明焗我过夜啫，向来玩day trade慨就更系唔想过夜啦，所以变相㖊日收工咩都无做过；到今日见到恒指裂口高开，到依家10点正，恒指高见30368点，系暂时慨高位，但同时间恒指5分钟SlowSTC(14,3)踩到严重超买区域，呢个位仲入唔入只恒指熊？快手慨话都唔系话唔得慨。
转返去睇日线图，今日恒指咁靓仔就更系见阳烛啦，不过日线图上见恒指高位虽然升穿过10天线(30333点)，不过以现价30322点计，似乎呢个突破未有系话非常企稳。再向上数，其实个市都仲有条20天线(30432点)顶住，过到呢两关先至再上望条50同100天线(30622点同30728点)啦。
今日5月8日，5月开局都有五个交易日，恒指暂时睇都仲系未有一个明确方向，但背负住“五穷月”嚟讲，对一班淡友嚟讲今日一弹都可能系比时间同机会个市场储多啲牛证，等牛仔变肥牛之后先至一次过屠杀。点解咁讲？睇恒揩牛熊证街货就明。依家10点11分，恒指做紧30336点，升341点，最高位就变咗系30379点。用个位度上恒指牛熊证街货图慨话，即系30200至30299点嗰嗰熊仔已经死亡，而呢度有相当于277张期指，再上慨话就系30300至30399点，用最高位嚟计，其实里面嗰387张期指都唔系剩返好多。假设唔计呢Part慨话，即系30400至30499点呢度最贴价，但就只有86张期指。
对比下方最贴价慨牛证，即29700至29799点，呢度有成1676张期指，啲货多到无朋友，再向下落多100点，即29600至29699点，呢度都有761张期指，“有无多一part有过千张？”梗系有啦，咪就系第三贴价区慨29500至29599点啰，呢度有相当于1454张期指，够未？但同现价就梗系有一段比较远慨距离啦，讲紧由现价(10点34分做紧慨30306点计，若然要食晒最贴价嗰三批牛证慨话，就要由现价起步向下跳806点先食得晒，唔贪心只系食第一层最贴价慨，都要600几点啦；反而咁睇上行都踩入咗啲街货区啰，继续行住先食住点心，之后一个屈尾十向下再屠杀啲牛证都唔出奇。
如果真系咁行慨话又符合咗日线图上个条“下降通道”慨走势，㖊日就触底反弹，今日一弹如果再弹多吓就上到“下降通道”顶，然后先至报仇咁报下向行，嗯，似系啦，上到20天线就更架肯定啦，就睇埋你条20天线上唔上到先再算啦。
作者阿珊，从事财经及投资版报道超过10年，由平面媒体走到网络世界，《钟摆战策赢港股》作者。相信技术分析，由窝轮到牛熊证无一不炒，唔贪心，志在揾餐下午茶。
电邮：[email protected]；微博：Gladyshan
