【轮证赢家】恒指又靠腾讯升？
㖊日下昼终于出咗去睇报告，结果返嚟慨系我除咗有少少坏胆固醇同三酸甘油脂高咗少少之外， everything under control，不过应该仲有一个终极检查，过多个星期先做，所以呢个星期都仲会返工打稿慨(我最唔明系点解我老爸食烟饮酒讲粗口，但佢上年验身之后医生同佢讲：你继续依家慨生活就得架啦！但我就要戒淀粉质啰…)。
今朝返到公司，头顶个风机嘈到我耳鸣咁滞，打电话去大厦管理处，一把靓女声同我讲：“无问题，即刻同你整。”Grade A真系Grade A，喺佢哋遥距帮我整风机慨期间，开恒指日线图见到今日恒指升穿咗㖊日画慨“楔形”，依家10点9分，恒指最高位暂时做过30844点，升穿咗条50天线同100天线(30645点同30772点)，虽然现价见30776点，不过都叫做升穿咗条50天线先。
技术上慨破都令到下方慨技术指标发出利好讯号，或者恒指翻生同腾讯(00700)走势突破“下降通道”有关。腾讯日线图上见由3月21日高位475.6元开始一直下行，仲筑成咗一条“下降通道”，10天线一度成为难以突破慨阻力，仲一度有怀疑过腾讯会下试250天线添；“系呀！系呀！有人仲话《腾讯没有梦想》添呀！”又唔似好关事㖞，因为呢单嘢就算出咗街都似乎无影响到个股价，咁最大慨原因就是呢篇文无烧着佢生意先啦。
下个星期三就系腾公布今年首季业绩，今日腾讯升穿20天线(394.83元)，用腾讯牛熊证街货嚟睇慨话系无嘢睇到慨，事关个股向来都系Call多过Put，牛多过熊，所以都系要用返恒指牛熊证街货，事关推升个市都要有股份做帮凶先得架嘛，若然市系有望上行慨话，咁向来做开蛇头慨腾讯上行慨机会率都高啲啦。
依家10点23分，恒指高位仍然都系30844点，用呢个位嚟计慨话，恒指今朝食咗30500至30599点，至30700至30799点呢三堆最贴价慨熊证，而呢度全数夹埋就有1433张期指，而依家最贴价慨变成30800至30899点，呢度有821张期指；重头戏就系30900至30999点，呢度有相当于1337张期指。今日星期四，如果个市真借腾讯业绩 > 推高腾讯股价 > 推高埋个市 > 食重货熊证，成件事好合理咁㖞。
再睇埋下方牛证，最贴价慨系30100至30199点，同现价太远了，又无乜肉食。恒指牛(68842)，收回价29788点，同现价有逾947点距离；又或者腾讯牛(69389)，收回价377.08元，约13倍杠杆，同现价有约6%差距。
作者阿珊，从事财经及投资版报道超过10年，由平面媒体走到网络世界，《钟摆战策赢港股》作者。相信技术分析，由窝轮到牛熊证无一不炒，唔贪心，志在揾餐下午茶。
电邮：[email protected]；微博：Gladyshan
