【轮证赢家】恒指保历加通道顶
㖊日恒指系威系势咁升逾400点，嗰个升势都真系唔系你同我可以抵挡得住，不过都有温馨提示过恒指连升六日，生咗三个上升裂口同埋两粒“十字星”咁慨物体出嚟，仲有日线图上慨SlowSTC(14,3)已经踩到严重超买水平；但再按恒指牛熊证街货图睇，一大堆熊证喺度又近又重货咁，所以推断大市慨升势会开始出现减速慨现像。
今朝早旧同事茶仔whatsapp嚟同我讲只app显示其中一只正股慨股价有问题，打完比data provider之后再打比product同事，搞完一轮个U盘话咁快完埋，恒指升32点，开市报31573点；依家9点52分，恒指升转跌，做紧31429点，跌111点。留意返，用当下呢个恒指日线图去睇，今朝恒指开市个位亦等同依家暂时慨高位，而㖊日高位就系31592点，就算今日稍后时间恒指由跌转返升，但上到3159X点慨话，阴阳烛图上就会出现“平顶”之象；听个名都唔开胃啦，若然你转一转唔用平均线，开条保历加通道出嚟睇慨话，包你早餐食唔落，lunch无胃口，因为㖊日恒指弹升逾300点系弹穿咗条保历加通道顶，而前日恒指粒“十字星”都有一半穿咗出去，今日暂时见到慨阴烛都系处于保历加通道顶以外慨范围。
咁灰暗慨走势图系咪就等于之后恒指无运行，终于系5月中(今日又真系15号㖞)先嚟“五穷月”呢？开埋恒指牛熊证街货图睇。依家10点1分，公司慨清洁阿姨嚟吸尘，阿姨孭住部吸尘机好似背囊咁，双手就拿住条喉就队落地下系咁吸，恕我孤漏寡闻，真系第一次见到吸尘都吸得咁型，Designer Ken形容为“捉鬼敢死队”；我问阿姨：系咪好重呀？阿姨话：系呀，好重架！我除咗同阿姨讲句唔该同麻烦晒，兼坐住张凳移开等阿姨好做啲之外，就只能够希望佢啲吸尘声快啲消失，因为一无声就即系阿姨吸完尘，佢就可以放底佢支“捉鬼枪”。
返番去睇恒指，10点9分mark底31341点，最高位仍然都系今开市价31573点，向上望熊证，最贴价慨熊证31600至31699点，呢度有相当于1121张期指，仲属于第二重货区，如果由现价向上行358点慨话，就可以食得晒呢堆街货。至于下方慨牛证最贴价就系30700至30799点，呢度有475张期指，但同现价比慨话，就要现价向下行641点。
“睇恒指牛熊证街货图就应该系上慨，但系走势图唔掂㖞 ！咁点呀？”确实系无办法去抵制走势图上所发出慨看淡讯号，再加上如果你系一早部署个市会掉下向下，好啦今日比你恨到啦，你会唔会乘胜追击？想一齐追跌慨可以趁恒指5分钟图出现超买时出手，仲未谂得掂慨就远观一下算啦！
作者阿珊，从事财经及投资版报道超过10年，由平面媒体走到网络世界，《钟摆战策赢港股》作者。相信技术分析，由窝轮到牛熊证无一不炒，唔贪心，志在揾餐下午茶。
电邮：[email protected]；微博：Gladyshan
